Ahi han uma-tradisionál Laiaval iha Lautém, sábadu (11/12). Imajen/Espesiál.

DILI, 15 dezembru 2021 (TATOLI)—Sekretáriu Estadu Arte no Kultura (SEAK), Teófilo Caldas, informa nia parte simu ona informasaun kona-bá ahi han uma tradisionál Leiaval iha aldeia Sentrál, suku Fuiloro, Postu Administrativu Lospalos, munisípiu Lautém.

Notísia Relevante: Bombeiru la konsege salva ahi-han uma-tradisionál Leiaval

“Ahi-han uma lisan iha Lospalos ne’e, ami rona ona no simu ona informasaun,” Teófilo Caldas, hateten ba jornalista sira iha resintu Parlamentu Nasionál, Díli, ohin.

Ahi han uma-tradisionál Laiaval iha Lautém, sábadu (11/12). Imajen/Espesiál.

Iha tnan 2019, SEAK ba haree ona uma tradisionál iha Lospalos ne’e tanba uma tradisonál refere sai hanesan simbolu ne’ebé iha valór indentidade nasionál Timor-Leste nian.

“Tanba uma ne’e, uluk iha tempu Indonézia publika ba mundu tomak sai hanesan identidade Timor nia simbol mak uma lulik ida-ne’e. Hosi ne’e mak ita hakarak halo konservasaun no prezervasaun,” nia dehan.

Iha tinan 2019, SEAK tau duni osan no komunidade iha Lospalos mós forma sira-nia komisaun organizadóra ida atu harii uma lulik ne’e, maibé depois komisaun ne’e namkari entaun la konsege realiza.

“Hosi ne’e, hanesan Sekretáriu Estadu Arte no Kultura ita tau nafatin importánsia atu iha tinan oin mai ita bele hadi’a fila-fali uma lulik. Maske, nia la iha valór sagradu, maibé nia iha valór identidade Timor nian. Tanba nia mak simbolikamente reprezenta Timor ba mundu ne’e mak ita hakarak konserva nia,” Governante ne’e informa.

Entretantu, uma tradisionál leziaval iha aldeia Sentrál, suku Fuiloro, postu administrativu Lospalos, munisípiu Lautém ne’e ahi-han iha loron sábadu (11/12) maizumenus tuku 10h00-resin.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here