Dezeñu biblioteka nasionál. Imajen espesiál

DILI, 10 janeiru 2022 (TATOLI)—Diretór Nasionál Biblioteka no Muzeu, João Fátima da Cruz, informa konstrusaun biblioteka nasionál sei hatuur fatuk dahuluk iha tempu badak ne’e  maibé agora sei hein bainhira mak publika manan-na’in ba konkursu hodi kaer obra ne’e.

Notísia Relevante: Rezultadu konkursu konstrusaun biblioteka nasionál fó sai tinan ikus 2021

“Konaba konstrusaun bibiloteka nasionál, tuir itania planu iha fulan janeiru ne’e hatuur ona fatuk dahuluk maibé ita sei hein bainhira mak bele públika naran ba kompañia ne’ebé manan konkursu atu halo konstrusaun ne’e,” João Fátima da Cruz, hateten ba jornalista sira iha nia knar fatin, Avenida Portugal, Dili, ohin.

Iha fulan ida-ne’e, sei realiza enkontru servisu entre Sekretáriu Estadu Arte no Kultura (SEAK), Autoridade Nasionál Petróleu no Minerál (ANPM) no kompañia internasionál hosi Italia naran ENI.

“Normalmente sei iha enkontru servisu entre SEAK, hamutuk ho ANPM no ENI, hafoin dokumentu sira-ne’e hotu sei legaliza hosi steering committee depois mak sei fó sai ba públiku, tanba ne’e ita hotu hein iha janeiru ne’e,” nia informa.

Diretór ne’e informa, kompañia ne’ebé tuir konkursu ba konstrusaun ne’e hamutuk kompañia neen (mesak) mesak kompañia internasionál de’it, no dadaun ne’e SEAK hein hela atu públika kompañia ne’ebé mak sai manan-na’in ba konkursu ne’e.

Biblioteka nasionál ne’e, finansiamentu mai hosi Kompañia Petróliu Itália nian naran “Eni” ne’ebé iha tinan 2018 esplora mina Kitang iha tasi Timor, entaun nia fó kontribuisaun sosiál ida mai Timor-Leste ho totál orsamentu millaun $10 hahú kedas hosi 2008.

Notísia RelevanteKonstrusaun Biblioteka Nasionál iha Faze Konkursu

Kompañia Petróliu “Eni” ninia responsabilidade maka atu harii biblioteka no prepara ekipamentu ba biblioteka nian. Governu Timor-Leste nia responsabilidade mak prepara rai, halo formasaun ba funsionáriu sira, bolsu estudu la’o daudaun no materiál sira hanesan livru iha tiha ona.

Ekipa ne’ebé haree sasán sira ne’e mak kompañia Eni, SEAK, ANPM (Autoridade Nasionál Petróliu no Minerál) no Obra Públika involve ministériu sira-ne’ebé ninia área serbisu relevante ba ida-ne’e.

Atu halo konstrusaun biblioteka nasionál iha Hudi-Laran, Bairru Pite, Dili, atribuisaun rai hosi Ministériu Justisa ho medida mil 27 kuadradu. Faze preparasaun terrenu halo hosi Sekretaria Estadu Arte no Kultura no ANPM ho orsamentu Estadu nian.

Notísia RelevanteKM Aprova Rezolusaun Konstrusaun Biblioteka Nasionál

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here