Kondisaun estrada rurál postu administrativu Hatubilico, munisípiu Ainaro. Imajen TATOLI/António Gonçalves

AINARO, 10 janeiru 2022 (TATOLI)—Ministru Obra Públika (MOP), Salvador Eugênio Soares dos Reis Pires, informa, daudaun Governu prepara planu estrada nasionál, ne’ebé inklui estrada ligasaun Ainaro-Bobonaro no Ainaro-Zumalai.

“Governu komunika hela ho Banku Nasionál Aziátiku (ADB, sigla inglés), ne’ebé osan poupansa balun hosi empréstimu sei halo estudu uluk, hafoin husu osan atu kompleta estrada, atu nune’e konesaun hosi munisípiu Aileu bá munisípiu rua ne’e di’ak atu fasilita komunidade halo movimentasaun no atividade ekonómiku,” Ministru hateten durante diálogu komunitáriu, iha salaun Parokiál Ainaro, segunda ne’e.

Notísia relevante: MOP Aprezenta Estratejia Investimentu Estrada Nasionál Ba KM

Tuir governante ne’e, polítika VIII Governu katak projetu hotu tenke liuhosi faze dezeñu atu identifika risku no haree ba mudansa klimátika daudaun ne’e, presiza haree uluk risku ambientál hosi fatin implementa projetu.

Aleinde ne’e, Governu hakarak trata projetu nu’udar prosesu sientífiku la’ós hanesan prosesu polítiku.

Estrada nasionál Ainaro-Bobonaro, antes ne’e tama kontratu projetu 143 iha tinan 2017, ne’ebé bazeia ba relatóriu, empreza konsórsiu rua ne’ebé toma konta ba projetu ne’e iha problema.

“Entaun progresu fíziku to’o de’it 24,6%. Ami kontaktu ona sira atu rezolve, maibé tanba projetu finansia hosi Fundu Infraestrutura, entaun tenki lori ba Konsellu Administrasaun Fundu Infraestrutura (KAFI) hodi haree filafali kontratu, ida-ne’e maka dezafiu,” Ministru akresenta.

Iha tinan 2018 to’o 2021, iha setór estrada no ponte halo projetu 28, kompostu hosi estrada kilómetru 126 ba Ainaro de’it konstitui hosi estrada rurál hamutuk 23, ho distánsia kilómetru 108, fahe ba manutensaun iha projetu 18, ho distánsia kilómetru 85 no reabilitasaun kilómetru 4,22.

“Estrada sira ne’e hola parte ida programa Estrada ba Dezenvolvimentu (R4D, sigla inglés), la’ós projetu International Labour Organizasaun (ILO), maibé organizasaun ne’e hetan kontratasaun atu fó asisténsia téknika, ne’ebé parte Governu Austrália mak selu atu tulun Governu Timor-Leste dezenvolve estrada rurál sira, maibé kapital investimentu mai hosi Governu Timor-Leste, ne’ebé kada tinan aloka iha Orsamentu Jerál Estadu (OJE) hodi halo manutensaun no reabilitasaun,” governante ne’e esplika.

Enkuantu, estrada nasionál iha territóriu tomak iha kilómetru 6.000-resin, konstitui ona kilómetru 1.200, ne’ebé orsamentu foti hosi empréstimu millaun $500-resin.

“Ita iha estrada munisípiu iha kilómetru 900-resin desde independénsia to’o agora, maibé foin halo de’it kilómetru 33 no estrada rurál kilómetru 3.700 foin halo de’it kilómetru 700-resin, uza osan desde independénsia to’o mai agora millaun $200,” nia dehan.

Estrada munisipál ida mak reabilitasaun estrada Hatu’udo-Ainaro no área Aiasa-Kasa ne’ebé iha tinan kotuk tama iha planu no KAFI aprova ona no tinan 2022 promove uluk ba estudu molok dezenvolve.

Seluk tan, Aitutu-Hatubuilico, Hatubuilico-Letefoho, ne’ebé sei liga ho munisípiu Ainaro, Ermera-Hatubulico, Hatubulico-Santuáriu Nai Feto Ramelau.

Daudaun ne’e dezeñu hotu ona, halo hela reajustamentu balun no haruka ona ba CNA hodi prepara fó sai konkursu iha tempu badak kuandu prosesu ne’e hotu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here