Primeiru-Ministru, Taur Matan Ruak, prezide reuniaun Konsellu Ministru iha Palásiu Governu. Imajen/Egas Cristovão

DILI, 05 juñu 2019 (TATOLI) – Ministru Obras Públiku, Salvador Eugénio Soares dos Reis Pires aprezenta estratejia tinan lima ba investimentu dezenvolvimentu no manutensaun estrada nasionál ba Konsellu-Ministru (KM).

“Konsellu-Ministru rona no haree oinsá bele asesu ligasaun estrada husi rede nasionál to’o rede munisipál atu bele dudu kresimenu ekonómiku iha futuru,”  tenik Ministru Reforma lejislativa no Asuntu Parlamentár, Fidelis Leite Magalhães ba jornalista sira iha Palásiu Governu, kuarta ne’e.

Hodi dehan, aprezentasaun ohin atu haree estimativa kustu ba manutensaun, fontes finansiamentu projetu inklui propoin kriasaun fundu, modelu no jestaun ba manutensaun estrada.

“Hirak ne’e ami rona de´it informasaun maibé ami seidauk bele divulga tanba Ministériu Obras Públika (MOP), Ministériu Finansa (MF) ho Ministériu seluk presiza tuur hamutuk hodi haree, fahe informasaun di´ak liután; sei envolve asisténsia téknika husi instituisaun ne’ebé fó asisténsia mai ita,”  hateten governante ne´e.

Alende ne’e, Konsellu Ministru mós aprova Proposta Rezolusaun husi MOP, kona-ba nomeasaun membru Konsellu Administrasaun Institutu Jestaun Ekipamentu (IGE-sigla portugés).

Nune’e, renova fali mandatu husi José Luís Carvalho hanesan Prezidente Konsellu Administrasaun IGE, enkuantu Abrão Pereira no Diamantino de Oliveira hanesan Vogál ba Konsellu Administrasaun IGE.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here