Primeiru-Ministru, Taur Matan Ruak, halo diálogu komunitáriu iha munisípiu Lautém, sesta (07/01). Imajen TATOLI/Jogerjo Guterres

LAUTÉM, 07 janeiru 2022 (TATOLI)–Primeiru-Ministru (PM), Taur Matan Ruak, enkoraja sidadaun hotu, liuliu populasaun Lautém atu partisipa másima iha Eleisaun Prezidénsial ne’ebé tuir planu sei realiza iha marsu 2022.

“Eleisaun prezidensiál liubá taxa partisipasaun 80%, entaun ha’u-nia pedidu ita hasa’e tan ba 90% ne’e di’ak liután. Tanba ne’e hatudu sidadaun eklaresidu ona, ita-sira ne’ebé nu’udar autoridade ne’ebé kaer nasaun tenke sai ezemplu di’ak, fó hanoin atu sira entende katak hili autoridade ne’e importante loos,” Xefe Governu, hateten iha ámbitu diálogu ho komunidade Lautém, iha Merkadu Lama, postu administrativu Lospalos, munisípiu Lautém, sesta ne’e.

Notísia relevante: PR sei dekreta kalendáriu eleisaun hafoin rona partidu polítiku sira

Xefe Ezekutivu nota mós katak Eleisaun Prezidensiál iha Timor-Leste durante ne’e sempre la’o di’ak, maski mosu problema kiik-oan maibé ein jerál la’o di’ak.

“Durante eleisaun la’o ho di’ak, ne’e kontribui hosi fatór rua hanesan pás no estabilidade. Ida-ne’e iha mak kandidatu no populasaun sira la tauk atu la’o ba-mai hodi partisipa iha festa demokrasia, hodi rona saida mak kandidatu sira ko’alia no aprezenta, hodi ajuda hili kandidatu ida-ne’ebé mak ita-nia matan monu ba,” nia akresenta.

Fatór seluk mak partisipasaun sidadaun iha fatin hotu iha mundu, ne’ebé iha avaliasaun kona-ba nível dezenvolvimentu demokrátiku.

Nune’e, PM husu ba autoridade lokál sira atu ajuda Governu asegura pás no estabilidade maski iha autoridade seguransa no defeza hodi asegura maibé ho kontribuisaun hotu.

Governu halo ona alterasaun ba Dekretu Governu, katak sidadaun sira bele ezerse sira-nia votu iha sentru votasaun ne’ebé de’it la persiza tuir kartaun eleitorál.

Dadus provizóriu hosi Sekretariadu Tékniku Administrasaun Eleitorál (STAE) rejista eleitór hamutuk 850.000.

Aleinde ne’e, durante vizita loron hitu ba munisípiu sira, hahú hosi loron 07 janeiru 2022, Xefe Governu husu sidadaun hamutuk kombate COVID-19 ho partisipasaun másimu iha kampaña vasina.

“Sidadaun sira ajuda kombate COVID-19, ne’ebé dalan di’ak mak vasina, entaun hotu-hotu tenki vasina, maski COVID-19 variante Delta laiha ona maibé agora mosu fali variante Omicron, tuir dadus iha Amérika populasaun infetadu millaun ida kada loron,” nia dehan.

PM mós husu atu munisípiu sira, liliu Lautém atu ezekuta Orsamentu Jerál Estadu (OJE) 2022 ho di’ak hodi implementa programa Governu ne’ebé Parlamentu Nasionál aprova ona.

“Governu iha projetu rua ne’ebé liga direta ho komunidade hanesan Programa Nasionál Dezenvolvimentu Suku (PNDS) no Uma Kbiit Laek (UKL) tanba tinan kotuk orsamentu alokadu millaun $20 no tinan ne’e millaun $71. Espesialmente iha Lautém tinan kotuk hetan UKL 102, maibé tinan ne’e 318 entaun husu ajuda ezekuta orsamentu ho di’ak. Asuntu seluk mak tinan 2023 sei realiza Eleisaun Parlamentár no Eleisaun Suku, tanba ne’e ita prepara daidaun,” PM informa.

Tuir ajenda, Xefe Governu sei halo vizita ba munisípiu sira, hahú hosi Manatuto no Baucau iha loron dahuluk no iha loron daruak iha Lautém, loron tuir mai sei vizita Viqueque, Manufahi, Ainaro, Covalima, Bobonaro, Liquiçá, Ermera, no Aileu.

Durante vizita, PM hetan akompañamentu hosi Ministra Saúde, Ministru Obra Públiku, Ministru Edukasaun, Juventude no Desportu, Ministru Ensinu Superiór Siensia no Kultura, Ministru Administrasaun Estatál no ninia Vise, no Sekretáriu Estadu Peska. 

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here