Diretór Jerál STAE, Acilino Manuel Branco. Imajen TATOLI/Egas Cristóvão

DILI, 06 janeiru 2022 (TATOLI)—Diretór Jerál Sekretariadu Tékniku Eleitorál (STAE), Acilino Manuel Branco, hateten STAE seidauk define empreza gráfika ne’ebé mak atu emprime bulletin votu.

Notísia Relevante: CNE-STAE halo levantamentu ba empreza gráfika atu emprime bulletin votu

“To’o agora ami seidauk hatene tanba prosesu ne’e sei liuhosi konkursu aprovizionamentu. Iha tinan kotuk halo ona levantamentu hodi identifika empreza gráfika maibé iha situasaun pandemia COVID-19, nune’e depois haree empreza sira-ne’ebé mak prontu atu emprime. Karik iha situasaun COVID-19 ne’ebé fó ameasa ba ita-nia país no sira iha protidaun bele emprime ka lae,” Diretór Jerál STAE hateten ba Agência TATOLI, iha nia knar fatin, Caicoli, Dili, kinta ne’e.

Prosesu sira-ne’e kontinua la’o liuhosi aprovizionamentu hodi hili mellor kompañia ne’ebé mak emprime bulletin votu, tanba emprime bulletin votu ne’e sei lori tempu kuaze semena rua no tanba STAE seidauk hatene kandidatura definitivu.

“Tanba ita seidauk hatene kandidatura defenitivu na’in hira no prosesu kandidatura ne’e seidauk hahú, tanba ita mós presiza define medida bulletin votu ne’e tanba nia implikasuan iha kustu. Kuantu mais kandidatu barak mak nia medida mós aumenta boot, entaun sei implika mós kustu ba bulletin votu,” nia dehan.

Nia dehan, ekipa STAE hahú atu halo dezeña ba modellu ho karáterïsitika ne’ebé mak prevee iha lei hodi fasilita prosesu aprovizionamentu, atu iha tempu badak sei hahú maibé depende mós ba empreza ne’ebé mak kumpre rekezitu no iha kondisaun di’ak hodi emprime.

Kona-ba orsamentu, nia hateten, orsamentu ba prosesu eleisaun prezidensiál iha dotasaun tudu Governu prevee millaun $9-resin, maibé ba emprime buletin votu ne’e rasik hein prepara modellu no lori hatene kandidatura na’in hira mak hafoin bele emprime no presu bulletin ne’e hira.

Antes ne’e, iha 16 juñu 2021, STAE hamutuk ho Komisaun Nasionál Eleisaun (CNE,sigla portugés) halo ona levanatementu ba empreza gráfika tolu hanesan Sentru Nasionál Alola Esperansa, Gráfika Nasionál no Empreza Nasionál.

Jornalista : Osória Marques

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here