Inan-Aman sira tuur hein hela oan sira iha sala emerjensia HNGV, ne'ebe hetan moras dengue, kuarta 5/1/2022.Imajen Tatoli/Antonio Dasiparu

DILI, 05 janeiru 2022 (TATOLI)— Ministra Saúde, Odete Maria Freitas Belo, informa, daudaun ne’e laiha estoke aimoruk kímiku abate atu hala’o atividade fomigasaun ka rega susuk iha área risku sira hodi prevene moras dengue.

Ministra Saúde, Odete Maria Freitas Belo. Imajen Tatoli/Francisco Sony

“Aimoruk kímiku abate ita iha problema tanba laiha stock out iha armazein, maibé daudaun iha ona prosesu aprovizionamentu ba akizasaun aimoruk ne’e. Ha’u espera ita sei hetan lalais iha tempu badak atu rega susuk sira”, Minista Odete hateten ba Agência TATOLI, iha Pálasiu Govenru-Dili, kuarta ne’e.

Tuir dadus estátistika hahú hosi janeiru to’o dezembru 2021, Servisu Saúde Munisípiu Dili (SSMD), rejista ema ne’ebé afetadu ba dengue hamutuk 672, hosi númeru ne’e, na’in-ualu mak mate.

Iha semana dahuluk fulan janeiru 2022, SSMD mós rejista ona pasiente ba kazu dengue hamutuk na’in haat.

Alende ne’e, Hospitál Nasionál Guido Valadares mós rejista pasiente ne’ebé daudaun baixa hamutuk 750, hosi númeru ne’e maioria pasiente ho pozitivu dengue.

Pesoál Médiku sira halo hela atendementu ba pasinete moras dengue iha salaun emerjénsia HNGV, kuarta 5/1/2022.Imajen Tatoli/Antonio Dasiparu

Governu konsidera kazu dengue ho númeru aas iha Timor-Leste, maibé durante fulan hirak ikus ne’e konsentra maka’as liuba surtu COVID-19, tanba ne’e ba oin presiza sensibiliza informasaun ba komunidade kona-ba prevensaun dengue, fomigasaun no kampaña nasionál sira.

Nune’e, Governante ne’e fó ona instrusaun ba Departamentu Promosaun Saúde  nafatin halo avizu ba komunidade liuhosi tama no sai bairru risku sira hodi komunidade hamoos lixu iha uma laran, areadór no fatin públiku sira.

”Ha’u husu ba populasaun sira hotu atu hamoos ida-idak nia uma hun no bee nalihun sira  hodi prevene moras dengue iha ita-nia rain,’’ Ministra Odete enkoraja.

Nune’e, MS husu ba inan-aman hodi fó atensaun ba labarik sira hodi  fó hatais ropa naruk  tanba susuk ne’e gosta tata iha  tempu loron.

Jornalista  : Felicidade Ximenes

Editór       :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here