Produtu lokál iha Merkadu Taibesi. Imajen TATOLI/António Gonçalves

DILI, 06 janeiru 2022 (TATOLI)—Ema hamutuk 50.000 ho rendimentu kiik sai ona benefisiáriu ba programa Governu seguransa alimentár, ne’ebé implementa hosi Sentru Lojístika Nasionál (CLN, sigla portugés).

“Tuir dadus maluk vulnerável ka família rendimentu kiik ne’ebé atu hetan direitu seguransa alimentár hamutuk 150.000, entaun etapa dahuluk ne’e ba benefisiáriu hamutuk 32.460, maibé ita implementa liu ona 50.000 iha territóriu laran tomak,” Prezidente CLN, Jervájio Cardoso de Jesus da Silva, hateten ba Agência TATOLI,  iha ninia knaar fatin, Bebora, kinta ne’e.

Notísia relevante: Governu hahú implementa programa seguransa alimentár hosi Aileu

Ba programa ne’e CLN kolabora ho Ministériu Adminitrasaun Estatál (MAE) ne’ebé antes ne’e halo ona levantamentu dadus ba família kbiit laek iha territóriu tomak.

“CLN halo distribuisaun bazeia ba dadus hosi MAE, ne’ebé tuir alvu implementasaun to’o marsu 2022 tenke ramata ona,” nia akresenta.

Enkuantu, empreza ne’ebé submete dokumentu ba Sentru Nasionál atu sosa produtu hamutuk 412, maibé hafoin selesaun dokumentu tun ba 320 no ikus mai na’in-276 mak konsege asina kontratu.

“Kona-ba prosesu pedidu pagamentu, dokumentu iha ona Ministériu Finansa (MF), agora hein sistema loke mak osan sei haruka ba empreza sira-nia konta bankária,” nia tenik.

Governu prevee orsamentu ba programa seguransa alimentár hamutuk millaun $12 no iha posibilidade CLN restoke ba armazen nasionál hodi halo intervensaun ba merkadu, nune’e bainhira mosu dezastre naturál, Governu iha kbiit atubele fó asisténsia ba komunidade afetadu, enkuantu restante sosa produtu lokál ne’ebé agrikultór sira kuda hodi halo distribuisaun.

Produtu ne’ebé Governu oferese liuhosi programa ne’e hamutuk neen hanesan foos, batar, fore-mungu, koto, fore-metan no fore-rai.

“Ai-han ho valór $30 sei fó ba sidadaun ne’ebé rejista-an iha ‘Livru Rejistu Uma-kain, nu’udar xefe família bainhira labele simu, sei reprezenta hosi membru ida hosi uma-kain ho otas 17 ba leten,” nia dehan.

Antes ne’e, Governu liuhosi Ministériu Koordenadór Asuntu Ekonómiku (MKAE), iha loron 21 dezembru 2021 halo ona lansamentu programa seguransa alimentár iha munisípiu Aileu.

Programa ne’e previstu iha lei númeru 8/2021, 3 maiu, ne’ebé altera Lei númeru 14/2020, 29 dezembru, refere ba Orsamentu Jerál Estadu (OJE) 2021 no aprovasaun medida ba apoiu sósiu-ekonómiku.

Antes ne’e, Prezidente Repúblika, Francisco Guterres ‘Lú Olo’ promulga ona Dekretu-Lei ne’e, ne’ebé medida ne’e mosu tanba haree ba impaktu negativu pandemia COVID-19 iha ekonomia nasionál, nune’e Governu propoin alterasaun ba lei 14/2020 ho medida foun oioin, inklui medida seguransa alimentár.

Lei ne’e fó kbiit ba CLN atu halo kontratu ho produtór lokál ka operadór komersiál seluk, hodi hetan ai-han nesesáriu hodi fahe ba sidadaun no família sira ho rendimentu kiik.

Mekanizmu implementasaun, CLN kontrata empreza lori produtu ba suku sira, no ikus mai autoridade lokál sira organiza halo distribuisaun ba benefisiáriu sira ne’ebé konsidera vulnerável.

Dekretu-Lei ne’e fó atensaun espesiál ba ema no família sira ho rendimentu la liu $1,90 kada loron-ida, ne’ebé atu define sé mak iha direitu ba apoiu espesiál ne’e, entidade responsável sira sei uza dadus hosi rejistu uma-kain ida-idak iha kada suku hosi MAE no Ministériu Solidariedade Sosiál no Inkluzaun (MSSI).

Jornalista : Armida Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here