Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DILI, 22 dezembru 2021 (TATOLI)–Governu liuhosi Ministériu Koordenadór Asuntu Ekonómiku (MKAE), halo ona lansamentu programa seguransa alimentár previstu iha lei númeru 8/2021, 3 maiu, ne’ebé altera Lei númeru 14/2020, 29 dezembru, refere ba Orsamentu Jerál Estadu (OJE) 2021 no aprovasaun medida ba apoiu sósiu-ekonómiku.

“Programa ne’e lansa iha tersa (21/12) iha munisípiu Aileu, atribui ba timor-oan ho rendimentu kiik, tanba ne’e hein katak tuir mai ekipa hosi Sentru Lojístika Nasionál (CLN, sigla portugés) halo distribuisaun iha munisípiu sira ne’ebé dadus loos ona,” Ministru Koordenadór Asuntu Ekonómiku, Joaquim Amaral, hateten, iha Palásiu Governu, kuarta ne’e.

Antes ne’e, Prezidente Repúblika, Francisco Guterres ‘Lú Olo’ promulga ona Dekretu-Lei ne’e, ne’ebé medida ne’e mosu tanba haree ba impaktu negativu pandemia COVID-19 iha ekonomia nasionál, nune’e Governu propoin alterasaun ba lei 14/2020 ho medida foun oioin, inklui medida seguransa alimentár.

Lei ne’e fó kbiit ba CLN atu halo kontratu ho produtór lokál ka operadór komersiál seluk, hodi hetan ai-han nesesáriu hodi fahe ba sidadaun no família sira ho rendimentu kiik.

Notísia relevante: PR promulga dekretu-lei ne’ebé benefísia família ho rendimentu kiik

Nune’e, Ministru kompromete MKAE no CLN nu’udar implementadór, sei esforsu molok tinan foun no benefisiáriu ne’ebé tama lista bele iha oportunidade simu.

“Mekanizmu implementasaun CLN mak kontrata empreza lori produtu ba suku sira, hosi ne’e maka autoridade sira organiza halo distribuisaun ba benefisiáriu sira ne’ebé konsidera vulnerável. Programa ne’e kuaze hanesan ho programa cesta bázika, maibé item ba produtu sira la barak, iha de’it haat ka lima de’it hanesan foos rai, batar, koto, fore, no forerai,” nia esplika.

Orsamentu ba programa millaun $12

Governu aloka ona orsamentu hamutuk millaun $12 ba implementasaun programa ne’e no iha posibilidade CLN restoke ba armazen nasionál hodi halo intervensaun ba merkadu, nune’e bainhira mosu dezastre naturál, Governu iha kbiit atubele fó asisténsia, enkuantu restante mak sosa produtu lokál ne’ebé agrikultór sira kuda hodi halo distribuisaun.

Durasaun ba programa ne’e prevee molok janeiru 2022 ramata bele finaliza ona atribuisaun sasán, maibé tanba daudaun tempu udan, ekipa esforsu hela atu aselera.

“Munisípiu ne’ebé lista kompletu ona sei halo distribuisaun uluk, tanba ne’e maka daudaun ne’e lista ne’ebé iha ona maka Aileu no Manufahi, maibé hosi Dili seidauk kompletu. Dadus provizóriu iha 30.000-resin,” governante ne’e dehan.

Dekretu-Lei ne’e fó atensaun espesiál ba ema no família sira ho rendimentu la liu $1,90 kada loron-ida, ne’ebé atu define sé mak iha direitu ba apoiu espesiál ne’e, entidade responsável sira sei uza dadus hosi rejistu uma-kain ida-idak iha kada suku hosi Ministériu Administrasaun Estatal (MAE) no Ministériu Solidariedade Sosiál no Inkluzaun (MSSI).

Ai-han ho valór $30 sei fó ba sidadaun ne’ebé rejista-an iha ‘Livru Rejistu Uma-kain’ nu’udar xefe família no bainhira labele simu, sei  reprezenta hosi membru ida hosi uma-kain ho otas 17 ba leten.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here