STAE realiza semináriu nasionál ba preparasaun Eleisaun Presidensiál 2022 iha Timor-Plaza-Dili, kuarta ne’e. imajen/ Egas Cristivão.

DILI, 22 Dezembru 2021 (TATOLI)— Governu liuhosi Ministériu Administrasaun Estatál (MAE) aprezenta ona kalendáriu tentativa realiza eleisaun prezidensiál, iha loron 18 marsu 2022, ba Prezidente Repúblika, Francisco Guterres Lú-Olo.

“Ha’u hanoin  preparasaun  órgaun eleitorál hanesan Sekretáriu Tékniku Administrasaun Eleitorál (STAE) no Komisaun Nasionál Eleisaun (CNE) atualiza ona ho kalendáriu tentativa ba Prezidente Repúblika, atu  eleisaun prezidensiál realiza iha 18 marsu 2022. Maibé depende ba desizaun Prezidente Repúblika atu dekreta data eleisaun,” Vise Ministru Administrasaun Estatál (MAE), Lino Toraxão, hateten, iha ámbitu semináriu Nasionál STAE ba Preparasaun Eleisaun Presidensiál  2022 iha  Timor-Plaza-Dili, kuarta ne’e.

Notísia relevante: Prezidente Repúblika sei dekreta kalendáriu eleisaun prezidensiál iha janeiru 2022

Tanba, tuir Konstituisaun-Repúblika Demokratiku Timor-Leste, Prezidente Repúblika mak iha kompeténsia ho baze ba artigu 86 (kompetésia kona-ba órgaun sira seluk), iha alínea c, hatete marka tuir lei loron eleisaun ba Prezidente-Repúblika no ba Parlamentu Nasionál.

Vice-Ministro da Administração Estatal, Lino de Jesus Torrezão. Imajen TATOLI/Egas Cristóvão

Nune’e, Governu fó ona rekomedasaun ba órgaun eleitórál sira atu hala’o serbisu ho profisionál hodi laiha intervesaun politika iha festa demokrasia ne’e.

“Ita husu ba populasaun-tomak ho konsensia hodi partisipa eleisaun hodi ezerse nia diretu ba desizaun tinan lima mai,” Governante ne’e sujere.

Iha biban hanesan, Diretór Jerál STAE, Acelino Manuel Branco, hateten, STAE hahú preperasaun másimu no laiha difikuldade realiza eleisaun prezidensiál iha tinan oin.

“Ita nian preperasaun iha tereñu, ita bele dehan kuaze atinje ona 100%, liuliu kona-ba identifikasaun sentru votasaun no   ekipamentu no matéria ba eleisaun hanesan tinta no bulletin votu no brigadista sira preparadu hotu ona”, Nia afirma.

Governu aloka $3.000.000 hodi parseiru UNDP halo akizasaun ba tinta ho indelevel ink hamutuk box 12.000 iha nasaun Dinamarka, ne’ebé to’o ona iha Timor-Leste.

Kuatidade tinta box 12.000 ne’e sufisiente uza iha eleisaun prezidensiál, no bele mós karik akontese segundu ronde. Enkauntu rekrutamentu brigada hamutuk 15.000 besik atu konklui ona.

STAE mós hetan apoia fundu hosi Governu Japaun liuhosi nia Embaixada iha Timor-Leste ho orsamentu millaun $4 atu finansia atividade eleisaun prezidensiál  liuliu hala’o edukasaun eleitorál ba sidadaun no hadi’a edifísiu STAE iha munisípiu Viqueque, Manatutu, Manufahi, Covalima no Dili.

Entretantu, Prezidente CNE, José Belo, hateten, órgaun eleitorál sira kontinua kolabora malu ho entidade-sira no parseiru sira atu fó susesu ba eleisaun presidensiál 2022.

“Ita hotu tenke hamtuk hodi fó susesu ba eleisaun ne’ebé maka mai no fó dignu ba kandidatu sira atu  konkore eleisaun ho di’ak no fó espasu ba populasaun sira  hodi ezerse  sira nian direitu iha sentru votasaun ho di’ak,” Prezidente CNE ne’e garante.

Embaixador Japaun iha Timor-Leste, Masami Kinefuchi, hateten, Governu Japaun  iha komitementu apoia Timor-Leste hodi eleisaun prezidensiál bele la’o susesu.

“Ami kontinua apoia ba Governu liuliu STAE ho orsamentu millaun $4 atu konstrui no reabilita edifisiu STAE iha munisipiu-sira,” Diplomata ne’e akresenta.

Entertantu, Reprezentante Rezidente UNDP iha Timor-Leste, Munkhtuya Altangerel, reforsa sei kontinua apoia Timor-Leste atu hala’o eleisaun presidensiál ho susesu.

“Ami kontinua fó ami nia apoia ba Governu Timor-Leste atu sai hanesan observadór hodi fó susesu ba eventu ne’e,” nia kompromete.

Notísia Relevante: MAE: eleisaun prezidensiál 2022 sei la’o ho forma imparsiál-neutru

Jornalista  : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here