DILI, 05 janeiru 2022 (TATOLI)–Prosesu verifikasaun dadus profesór voluntáriu iha territóriu nasionál seidauk ramata, maibé daudaun parte Ministériu Edukasaun Juventude no Desportu (MEJD) iha ona totál profesór voluntáriu hamutuk 4.000 mak rejista ona.
“Ein prinsípiu prosesu verifikasaun dadus ba profesór voluntáriu iha munisípiu sira ramata ona, maibé agora falta de’it munisípiu Dili mak seidauk konklui. Ami sei kompila dadus sira, bainhira ramata maka ami sei hahú fali verifikasaun iha munisípiu Dili, ita hein katak janeiru nia laran ne’e ita bele hahú ona,” Ministru Edukasaun Juventude no Desportu (MEJD), Armindo Maia, hateten iha Palásiu Governu, kuarta ne’e.
Notísia relevante: MEJD rejista dadus provizóriu profesór voluntáriu 2.382 iha territóriu nasionál
Tuir planu ministériu, prosesu verifikasaun konklui ona maibé kada loron dadus sempre tama foun.
“Maski verifikasaun dadus seidauk finál, maibé dadus provizóriu ne’ebé MEJD rejista hahú aumenta. Antes ne’e ita iha profesór voluntáriu 1.500 maibé agora sa’e ba 4.000,” nia akresenta.
Nune’e, parte ministériu sei esforsu atu finaliza, nune’e planu no programa rekrutamentu ba profesór 975 bele hetan konsiderasaun.
Jornalista : Tomé Amado
Editora : Julia Chatarina
