Ministru Edukasaun, Juventude no Desportu, Armindo Maia. Imajen TATOLI/Francisco Sony

DILI, 03 dezembru 2021 (TATOLI)–Ministériu Edukasaun, Juventude no Desportu (MEJD) akumula ona dadus provizóriu profesór voluntáriu iha territóriu nasionál hamutuk na’in-2.382.

Ministru Edukasaun, Juventude no Desportu, Armindo Maia, hateten, ministériu rekolla liuhosi programa re-verifikasaun nasionál iha munisípiu 12.

“Iha prosesu re-verifikasaun, ekipa simu tan lista adisionál profesór voluntáriu hamutuk 342. Bele dehan dadus ne’e hanesan faze dahuluk, tanba dadus balun ita tun ba maka foin rekolla no balun antes ona, ne’ebé dadus sira seidauk finál,” Ministru Armindo informa iha Parlamentu Nasionál (PN), sesta ne’e.

Notísia relevante: MEJD verifika dadus profesór voluntáriu 1.500 iha territóriu nasionál

Bainhira dadus sira tama hotu ona, MEJD sei halo identifikasaun inklui klasifikasaun atu buka hatene númeru loloos.

“Keta halo durante ne’e balun kaer hela to’os maibé naran tama nu’udar profesór voluntáriu,” nia akresenta.

Tuir governante ne’e, dadus provizóriu profesór sei hetan desizaun finál bainhira ramata ona re-verifikasaun iha Dili, ne’ebé sei taka iha loron 15 dezembru.

Aleinde ne’e, iha mós dadus profesór 5.203 to’o agora kontinua hela ho estatutu kontratadu.

“Kazu ne’e ministériu sei entrega ba Konsellu Ministru no Komisaun Funsaun Públiku mak sei deside atu apar ho lei rekrutamentu funsionáriu permanente. Ami sei buka dalan atu rezolve ho neneik problema profesór kontratadu sira iha tinan oin mai,” Ministru dehan.

Jornalista : Tomé Amado 

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here