Primeiru-Ministru, Taur Matan Ruak, prezide reuniaun Konsellu Ministru. Iha Palásiu Governu, kuarta (05/01). Imajen TATOLI/Francisco Sony

DILI, 05 janeiru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu Dekretu Governu ne’ebé aprezenta hosi Ministru Administrasaun Estatál (MAE), Miguel Pereira de Carvalho, ho objetivu atu altera ka komplementa regulamentasaun hosi Lei Eleitorál ba Prezidente Repúblika.

“Alterasaun ne’e hodi hatan ba nesesidade ne’ebé sei salvaguarda respeitu norma sira, ho objetivu atu impede propagasaun no diseminasaun COVID-19 hosi populasaun,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun Ezekutivu, iha Palásiu Governu.

Notísia relevante: PR sei dekreta kalendáriu eleisaun hafoin rona partidu polítiku sira

Ho hanoin ida-ne’e, ezekutivu sira aprova ona Dekretu Governu 10, hanesan alterasaun dahuluk ba Dekretu Governu númeru 5/2017, loron 17 fevereiru, ne’ebé regulamenta kampaña no propaganda eleitorál.

Alterasaun dahuluk ba Dekretu Governu númeru 6/2017, loron 27 fevereiru, ne’ebé regulamenta organizasaun no funsionamentu sentru votasaun no estasaun sira votu.

Aleinde ne’e, aprova mós alterasaun dahuluk ba Dekretu Governu númeru 7/2017, loron 27 fevereiru, ne’ebé regulamenta prosedimentu votasaun, kontajen no apuramentu rezultadu sira.

Nune’e mós, aprova alterasaun dahuluk ba Dekretu Governu númeru 8/2017, loron 27 fevereiru, ne’ebé aprova prosedimentu tékniku sira ba realizasaun eleisaun prezidensiál sira iha estranjeiru.

Alterasaun dahuluk ba Dekretu Governu númeru 9/2017, loron 27 fevereiru, ne’ebé regulamenta atividade observasaun no aprova ona alterasaun dahuluk ba Dekretu Governu númeru 10/2017, loron 27 fevereiru, ne’ebé aprova prosedimentu tékniku sira ba realizasaun atividade sira kobertura jurnalístika nian ba eleisaun prezidensiál.

Alterasaun dahuluk ba Dekretu Governu númeru 12/2017, loron 27 fulan-fevereiru, kona-ba ezersísiu direitu votu nian iha estabelesimentu ospitál no prizionál sira.

Halo alterasaun dahuluk mós ba Dekretu Governu nian númeru 13/2017, loron 27 fevereiru, ne’ebé regulamenta atividade fiskalizasaun husi prosesu eleitorál nian.

“Regulamenta kona-ba aprezentasaun kandidatura ba eleisaun Prezidente Repúblika, ezersísiu direitu votu eleitór sira ne’ebé internadu iha sentru izolamentu profilátiku obrigatóriu, sentru izolamentu terapéutiku obrigatóriu ka iha kumprimentu izolamentu profilátiku ka izolamentu terapéutiku obrigatóriu iha domisíliu ida ne’e ka iha fatin legalmente ne’ebé admite ba efeitu,” Portavóz Governu subliña.

Jornalista : Antónia Gusmão  

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here