CAAKUB sosa hare-kulit tonelada 130 hosi agrikultór Bobonaro
BOBONARO, 10 novembru 2021 (TATOLI)— Sentru Atendimentu Agríkola Kuda Ulun Bobonaro (CAAKUB), sosa hare-kulit tonelada 130 hosi agrikultór munisípiu Bobonaro.
Prezidente CAAKUB, AntÓnio Barreto da Conceiçao, informa hare-kulit hirak-ne’e sosa hosi agrikultór hamutuk 140 maoria iha postu administrativu Maliana ho folin kada kilo sentatvu $40.
“Hare-kulit 130 tonelada ne’e ami foin dulas tolenada 30, nia rezultadu ami hetan sai fós hamutuk 16 tonelada ho 530 kilograma, fós-ikis ami hetan tonaleda 3 kilograma 720 no hare-uut ami hetan tonelada neen (6) ho 450 kilograma. Ida ne’e mak rezultadu hosi fulan-juñu to’o outubru,” nia ko’alia iha Maliana, kuarta ne’e.
Maibé sei falta tonelada 100 mak iha hela armazein on espera tinan ne’e bele dulas hotu. Rezultadu ho prosesamentu hirak-ne’e halo ona distribuisaun ba loja sira iha kapitál Dili hanesan Meymart Fatuhada, Timor Plaza, Graçia supermerkadu no sentru supermerkadu Kampung Alor no mós restaurante balu iha kapital Bobonaro.
“Fós hira-ne’e ita fa’an kilo-ida ho folin $1.10 sentavu, ba iha 25kg ne’e ita fa’an iha Bobonaro de’it $26,50 sentavu, maibé iha Dili sa’e fali ba $27,50 sentavu, depois 10kg ne’e iha Bobonaro ita fa’an $11 dolar, ba Dili $12. Enkuantu fós-ikis 25kg ne’e kona $10 dolar no hare-uut 30kg fa’an $5 dolar,” nia esplika.
Prezidente CAAKUB ne’e informa, daudaun ne’e totál rendimentu ne’ebé hetan hamutuk rihun $31-resin rai iha BNCTL no rendimentu hosi loja agrikultór sira iha kapitál Dili rihun $16-resin.
Entretantu, durante tinan rua nia laran CAAKUB hetan apoia orsamentu hosi Governu liuhosi Ministériu Agrikultura no Peska (MAP) iha tinan 2020 to’o 2021 hamutuk rihun $60,000.00 no dadaun ne’e ezekuta ona rihun $40-resin.
Jornalista : Sérgio da Cruz
Editór : Evaristo Soares Martins
