Ró Berlin Nakroma atraka iha Portu Dili. Imajen TATOLI/António Gonçalves

DILI, 04 janeiru 2022 (TATOLI)—Prezidente Autoridade Portuária Timor-Leste (APORTIL), Flávio Cardoso Neves, hateten, semana ne’e ró-ahi Berlin Nakroma sei ba halo manutensaun kompletu iha Surabaya, Indonézia.

“Ró Berlin Nakroma antes ne’e sempre halo manutensaun iha Indonézia, maibé ha’u muda hotu nia mekanizmu, ita identifika uluk ró nia kondisaun saida mak a’at, ita konvida empreza Ocean Timor nia espesialista mai hadi’a de’it iha Timor-Leste. Maibé daudaun atu ba halo manutensaun kompletu iha Surabaya,” Prezidente APORTIL informa ba Agência TATOLI, iha ninia knaar fatin, Portu Dili, tersa ne’e.

Notísia relevante: PM Taur preokupa infraestrutura manutensaun ba ró-ahi

Durasaun manutensaun kompletu sei la to’o fulan-tolu bele ramata no ró-ahi bele fila mai Timor-Leste.

“Agora atu haree ró nia okos keta dodok karik presiza hadi’a no pinta fali, tanba Timor-Leste laiha fasilidade atu hiit sa’e ró, entaun tenke lori bá Indonézia,” nia akresenta.

Antes ne’e, ró-ahi ne’e hadi’a ona mákina iha Timor-Leste iha semana kotuk no halo prova de már ho objetivu atu garante katak ró bele halo viajen no atu sukat forsa no haree funsaun mákina prinsipál inklui materiál auxiliar, ne’ebé hosi ninia rezultadu hatudu katak buat hotu la’o di’ak.

“Ema barak la konkorda desizaun bolu espesialista sira mai Timor-Leste atu hadi’a mákina ró, maibé ida-ne’e ninia impaktu pozitivu tanba orsamentu ne’ebé hasai halo manutensaun ne’e la boot hanesan ba halo manutensaun iha rai-li’ur. Maski foin hahú maibé ita hetan rezultadu di’ak tanba iha espesialista mai hadi’a no timor-oan bele akompaña, nune’e bele hatene buat barak, ha’u hanoin serbisu balun la presiza bá Indonézia maibé ita tenke fó oportunidade ba timor-oan sira nune’e sira mós toman iha setór marítima,” nia hateten.

Biban ne’e, Prezidente APORTIL husu ba Governu atu halo planu konstrusaun ba fatin manutensaun, atu nune’e ró seluk hanesan Berlin-Ramelau la persiza ba halo manutensaun iha Indonézia tanba han tempu no gasta osan barak.

“Baibain ba halo manutensaun sistema mákina iha rai-li’ur bele han tempu fulan-tolu, maibé ita hadi’a de’it iha Timór la to’o fulan-tolu, nune’e ita espera Timor-Leste iha fatin manuntensaun tanba bainhira ita halo manuntensaun ró iha rai-li’ur ne’e di’ak maibé ita labele kontrola ho di’ak no folin bele to’o $380.000 to’o $600.000,” nia dehan.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here