Primeiru-Ministru, Taur Matan Ruak, halo vizita ba ró-ahi Berlin-Ramelau, iha Portu Dili, segunda (20/12). Imajen TATOLI/Egas Cristóvão

DILI, 20 dezembru 2021 (TATOLI)–Primeiru-Ministru (PM), Taur Matan Ruak, preokupa ho infraestrutura manutensaun ró-ahi sira tanba durante ne’e Timor-Leste iha ró maibé kada tinan tenki ba halo manutensaun iha Indonézia.

“Kooperasaun ho Alemaña hanesan projetu daruak, tanba ró dahuluk  halo iha tinan-10 liubá, bainhira ha’u hanesan Jenerál, iha momentu ne’ebá ko’alia kona-ba transporte marítima, ha’u-nia tékniku sira iha Forsa Armada partisipa reuniaun barak ho Minisériu Transporte no Komunikasaun (MTK) no reprezentante Alemaña. La’ós de’it ko’alia ró maibé posibilidade harii infraestrutura manutensaun ró. Momentu ne’ebá hili uluk Hera, hafoin altera fali ba Tibar, finalmente tinan barak liu, infraestrutura manutensaun ró laiha,” PM Taur hateten liuhosi diskursu iha ámbitu seremónia hand over ró-ahi Berlin-Ramelau, ne’ebé realiza iha Portu Dili, segunda ne’e.

Notísia relevante: Situasaun COVID-19 difikulta manutensaun ró-ahi Berlin Nakroma no Success

Xefe Governu konsidera ró-ahi Berlin Nakroma no Berlin-Ramelau di’ak no kapas, maibé la justifika manutensaun, tanba ne’e kada tinan tenke haruka bá Indonézia halo manutensaun.

“Ita iha osan sosa ró maibé laiha osan atu halo bengkel, hanesan mós sosa karreta foun maibé bengkel laiha. Tanba ne’e, nu’udar Primeiru-Ministru hakarak apela ba kooperasaun Alemaña, Timor-Leste disponível halo parseria iha konstrusaun infraestrutura menutensaun ró sira tanba númeru ró aumenta,” nia akresenta.

Aleinde ne’e, Forsa Armada iha tinan-2023 sei iha ró haat, ne’ebé rua mai hosi Austrália no rua sosa hosi Xina.

“Unidade Polísia Marítima iha ró rua, la sura sira seluk, enkuantu Ministériu Transporte no Komunikasaun iha rua, ne’ebé kuaze iha ró ualu,” nia tenik.

Xefe Governu konsidera bainhira kada tinan haruka ró-ahi ba Indonézia halo manutensaun, bele lakon rekursu no tempu.

“Ha’u apela ba Governu Alemaña atu rekonsidera ida-ne’e, se bele reforsa parseria iha área marítima kompleta ho infraestrutura manutensaun ró sira nian. Ha’u fiar nia kustu sei la liu ró sira ne’ebé sosa ou bele menus tan,” Xefe Ezekutivu dehan.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here