Membru Parlamentu Nasionál presta omenajen ba Saudozu, Deputadu Silvino Adolfo Morais, iha sala Plenaria Parlamentu Nasionál, tersa (04/01). Imajen Tatoli/Francisco Sony.

DILI, 04 janeiru 2022 (TATOLI)—Parlamentu Nasionál (PN), tersa ne’e aprova votu pezár númeru 1/V, 4a ba atuál Deputadu Fretilin, Silvino Adolfo Morais hodi fó sentidu kondolénsia kle’an ba saudozu no família, ho rezultadu votasaun a-favór 36, kontra no abstensaun laiha.

Notísia Relevante: Deputadu Silvino Morais hakotu iis tanba ataka kardiaku

“Nune’e votu pezár ne’e aprovadu,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi plenária extraordinária, tersa ne’e.

Deputadu proponente ba votu pezár ne’e aprezenta hosi David Ximenes Madanti (Fretilin), Deputada Olinda Guterres no Patrocinio Fernandes.

Mambru PNTL hasan mate-isin Saudozu Silvino Adolfo Morais, ba iha sala Plenária Parlamentu Nasionál, nune’e membru Parlamentu Nasionál sira hodi presta omenajen ikus, tersa (04/01). Imajen Tatoli/Francisco Sony.

Deputadu David Mandati sente triste tanba partidu Fretilin lakon nia kuadru di’ak ida, ho ida-ne’e lori bankada Fretilin nian hato’o sentidu lutu kle’an ba saudozu no família.

Nia hateten, kuiñese matebian iha tempu rezisténsia ne’ebé fó ona kontribuisaun inklui hanesan membru União Nacional dos Esrudantes Timores (UNETIM).
Xefe Bankada KHUNTO, Olinda Guterres, hateten mezmu iha Parlamentu bele hakilar no hirus malu maibé família Parlamentu ida de’it, nune’e sente triste tanba lakon ona ema di’ak ida hanesan kolega deputadu.

Deputadu CNRT, Patrocínio Fernandes, dehan nia parte kuñese saudozu bainhira hala’o servisu no kna’ar hanesan deputadu iha kinta lejislatura ne’e.

Nia fó sasin katak saudozu nu’udar ema-ne’ebé kalma dedikadu tebes hala’o servisu, tan ne’e Parlamentu lakon ema ida nune’e testu ne’e fó duni votu pezar.

Nia lori bankada CNRT nia naran hato’o sentidu profunda ba saudozu ho família no partidu Fretilin ne’ebé lakon nia kuadru di’ak ida.

Família lori mate-isin Saudozu Deputadu, Silvino Adolfo Morais, hakat tama ba iha Parlamentu Nasionál. Imajen Tatoli/Francisco Sony.

“Ho hakruuk ba saudozu nia mate-isin hodi fó omenajen ikus hato’o sentidu kondolénsia ba saudozu no família, no husu família iha korajen nafatin hasoru situasaun ne’e,” Deputadu ne’e hato’o ho lian triste.

Maske nune’e, nia dehan, saudozu nia memória la lakon no orasaun akompaña nafatin saudozu iha Maromak nia kadunan santu.

Entretantu, iha sesaun solene ne’e, deputadu no funsionáriu sira iha PN ho família sira hamutuk kanta Ino Nasionál ‘patria! Patria!”, no fó minutu ida hakmatek nian hodi fó omenajen no onra ba saudozu nia dedikasaun no kontribuisaun ba Estadu.

Jornalista : Nelson de Sousa

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here