Saudozu Silvino Adolfo Morais. Imajen/Espesiál.

DILI, 04 janeiru 2022 (TATOLI)—Xefe Departamentu Emerjénsia Hospitál Nasionál Guido Valedares (HNGV, siglá portugés), Vidal de Jesus Lopes, hateten atuál Deputadu Fretilin Silvino Adolfo Morais hakotu iis iha tuku 22h10 kalan, segunda (03/01), tanba ataka kardiaku (fuan).

“Horikalan Deputadu ne’e mai hakotu iis (HNGV) iha tuku 22h10 kalan, tanba ho problema ataka fuan ka kardiaku,” Xefe Departamentu Emerjénsia ne’e informa ba jornalista sira iha HNGV, Bidau, Dili, tersa ne’e.

Iha biban ne’e, pesoál saúde sira labele konsege salva Deputadu nia vida tanba problema ataka kardiaku. Moras ne’e, ita labele dependente ba tempu bainhira atende sedu bele salva maibé depende ba tipu ataka nia área luan mp defisíl atu salva.

Doutór Vidal de Jesus seida’uk fó informasaun detallu liután kona-ba matebian transporta hosi uma mai ho kondisaun grave ona, ho mós istória moras antes ne’e tanba sei hein relatóriu kompletu.

Biografia

Deputadu Silvino Adolfo Morais moris iha postu administrativu Atabae, munisípiu Bobonaro iha loron 19 jullu 1956.

Iha tinan 1962 hahú hala’o estudu ensinu primeiru no segundu klase iha postu administrativu Atabae, no frekuente ensinu primária iha koléjiu Infante Sagres Maliana, terseira to’o konklui kuarta klase iha 1968, kontinua estudu eskola téknika Silva Cunha, Dili (atual kampus UNTL) iha 1969-1975.

Saudozu nu’udar membru União Nacional dos Esrudantes Timores (UNETIM) hafoin akontese revolusaun dos cravos iha Portugál 25 abríl 1974. Iha momentu ne’ebá, movimentu estudantil reúne estudante timor-oan hamutuk ho Fretilin, luta kontra kolonializmu no okupasaun hosi nasaun estranjeiru.

Koinsidénsia ho invazaun Indonésia tama Timor-Leste iha 07 dezembru 1975, saudozu fila-fali ba foho hanesan milísia Falintil ba pro-independensia, destaka iha fronteira súl no norte lori karreta hodi transporta munisaun iha rejiaun refere.

Durante rezisténsia iha baze apoiu, saudozu asume mós kargu nu’udar komandante sesaun ho dedikasaun tomak, nune’e promove ba komandante pelotaun to’o hetan kapturasaun hosi militár Indonésia iha abríl 1979.

Durante okupasaun Indonésia, hahú hosi 1980 to’o 1999, saudozu hanesan funsionáriu públiku iha dirasaun Penerangan iha Bobonaro.

Iha tinan 2000 to’o 2005, saudozu hanesan Segundu Vise Koordenadór Komisaun Polítika Munisipál partidu Fretilin nian iha munisípiu Bobonaro, enkaregadu koordenadór Interinu durante periódu 2005 to’o 2010, Fretilin Bobonaro no eleitu hanesan Koordenadór Distritál Fretilin Bobonaro ba periódu 2010-2016 no re-eleitu ho kargu nafatin 2016-2021.

Saudozu eleitu mós hanesan membru Komite Sentrál Fretilin (CCF, siglá portugés) iha fulan juñu 2016 reprezenta munisípiu Bobonaro to’o ohin loron.

Saudozu mós hanesan membru Konsellu Konsultivu Munisipál Bobonaro hahú 2016 to’o iha dezembru 2021.

Saudozu nia pozisaun profisionál ne’e konsege asume kargu hanesan Diretór Child Fund ramu Batugade desde 2001-2017.

Saudozu eleitu hanesan deputadu Parlamentu Nasionál iha 2017 no re-elitu iha 2018 iha eleisaun antesipada, ne’ebé koloka iha komisaun F.

Tuir ajenda ne’ebé Agéncia Tatoli asesu katak, daudaun ne’e mate-isin hatuur hela iha ninia rezidénsia Tasi-Tolu.

Iha iha tuku 14h00 lorokraik, família sei lori mate-isin ba iha Parlamentu Nasionál hodi presta omenajén.

Hafoin ne’e, mate-isin sei lori ba iha sede Partidu Fretilin iha Comoro hodi fó mós omenajen ikus.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here