Ilustrasaun peskiza. Imajen/Espesiál

DILI, 27 outubru 2021 (TATOLI)–Peskizadór timor-oan na’in-16 ne’ebé kolabora ho Institutu Nasionál Siénsia no Teknolojia (INCT) iha tinan kotuk, hodi halo peskiza iha area siénsia sosiál, siénsia naturál, siénsia ezata, inovasaun teknolójika no étika peskiza, halo aprezentasaun estudu preliminár liuhosi semináriu durante loron-haat.

Vise-Prezidente INCT, Valentim Ximenes, hateten, atividade ne’e hodi akompaña aprezentasaun peskizadór, hafoin sei kontinua halo peskiza.

 “Ita realiza semináriu peskiza sientífiku atu promove koñesimentu sientífiku no teknolójiku iha Timor Leste, atu fó biban ba peskizadór sira hato’o rezultadu serbisu mai institutu atu haree, hafoin peskizadór ne’ebé seidauk konklui estudu peskiza bele kontinua kompleta filafali to’o ramata,” Vise-Prezidente INCT informa ba Agência TATOLI, iha salaun INFORDEPE, Balide, kuarta ne’e.

Área peskiza ne’ebé peskizadór sira foti barak liu mak siénsia sosiál, siénsia naturál no inovasaun teknolójika.

Avaliasaun finál sei halo, hafoin peskizadór sira konklui ona estudu peskiza no sei mai fali aprezenta rezultadu ba daruak, atu nune’e INCT bele fó apresiasaun hodi publika rezultadu peskiza.

Bainhira publika ona rezultadu peskiza, sei entrega ba ministériu relevante tuir tópiku peskiza, atubele hadi’a polítika públika hodi lori dezenvolvimentu rai-laran ba futuru di’ak liu.

Ba asuntu ne’e, INCT halo kontratu ho peskizadór sira to’o konklui rezultadu peskiza no konta ba kada grupu peskiza hetan osan $5.000 ba atividade.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here