Ró-ahi Berlin-Ramelau atraka iha Portu Dili, sesta (10/12/2021). Imajen TATOLI/António Gonçalves

DILI, 03 janeiru 2022 (TATOLI)-Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hateten, semana ne’e nia laran, ró-ahi Berlin-Ramelau sei halo operasaun normál bá-mai Dili – Oé-cusse.

“Semana ne’e sei halo operasaun semana ida dala-tolu, ho objetivu evita lori kapasidade sasán no ema todan liu, nune’e tenke tula oituan tuir kapasidade ró, tanba antes ne’e halo ona operasaun ho di’ak,” Prezidente APORTIL hateten ba Agência TATOLI, iha ninia knaar, Portu Dili, segunda ne’e.

Tuir Flávio Cardoso, tanba iha ámbitu loron boot natál no tinan foun, ró-ahi ne’e halo operasaun semana ida dala-tolu hodi fasilita komunidade fila hosi Oé-cusse mai Dili, maibé ba oin Berlin-Ramelau sei halo operasaun semana ida dala-rua de’it.

“Komunidade ne’ebé sosa billete hosi Oé-cusse atu filafali mai Dili, tuir estimasaun bele to’o loron 07 janeiru. Aleinde ne’e, Governu halo ona koordenasaun ho náviu rápidu atu bele halo operasaun troka malu hodi fasilita komunidade mai Dili,” nia akresenta.

Notísia relevante: METO husu Governu autoriza ró Berlin-Ramelau halo ona operasaun

Presu billete ró-ahi Berlin-Ramelau hanesan mós Berlin Nakroma, ho $8, ne’ebé folin ne’e bazeia ba desizaun iha Konsellu Ministru.

“Ba ha’u importante ita tenke tau presu di’ak no tenke haree ba empreza sira, ita labele halo barratu liu hodi prejudika fali empreza sira,” nia akresenta.

Iha sorin seluk, APORTIL mós hakarak iha presu billete asesível ba populasaun tomak.

“Governu nia objetivu dahuluk mak oinsá konetividade Ataúro no Oé-cusse ne’e la’o ho di’ak atubele garante katak Timor-Leste iha tranportasaun kapas entre illa rua ne’e,” nia tenik.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here