Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

DILI, 20 dezembru 2021 (TATOLI)— Parlamentu Nasionál haruka ona proposta lei númeru 35/V(4a) Orsamentu Jerál Estadu (OJE) 2022 ho montante billaun $2,1, ba Prezidente Repúblika, Francisco Guterres ‘Lú-Olo’. 

“Proposta OJE 2022, ohin dader, ha’u haruka ona ba Prezidente Repúblika. Tuir kompeténsia Xefe Estadu nia ho prazu loron 30 atu halo promulga ou veta, karik liu ne’e kompeténsia hosi Prezidente Repúblika,” Prezidente Parlamentu Nasionál, Deputadu Aniceto Longuinhos Guterres Lopes, informa ba Jornalista sira iha Parlamentu Nasionál, segunda ne’e.

Notísia Relevante: PN aprova proposta OJE 2022 billaun $2 iha finál globál

Parlamentu Nasionál aprova proposta lei númeru 35/V(4a) OJE 2022 ho rezultadu votasaun a-favór 44, kontra 21 no abstensaun 0.

Antes ne’e montante tetu OJE 2022 ne’ebé Governu submete ba PN ho montante billaun $1,675, ne’ebé milaun $233 ba saláriu no vensimentu, milaun $449,98 ba bens no servisu, millaun $565,9 ba transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.

Maibé, liuhosi debate espesialidade iha proposta adisionál hamutuk 165 ne’ebé aprezenta hosi reprezentante povu no hosi proposta hirak halo aumenta orsamentu adisionál millaun $300-resin, nune’e halo tetu OJE 2022 sa’e ba bilaun $2,1 tanba atu utiliza ba nesesidade povu no nasaun.

Bazea ba livru 2 planu annual OJE 2022 integra programa hamutuk 45, sub-programa 477 no totál atividade 2,445.

OJE 2022 atu finansia programa prioridade nasionál neen hanesan dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu (agrikultura no turizmu), ambiente no konetividade, dezenvolvimentu setór privadu no kooperativa, dezenvolvimentu rurál, no boa governasaun, ho objetivu atu atinje dezenvolvimentu ne’ebé kualidade ho kreximentu ekonómiku ne’ebé inkluzivu no sustentável.

Alokasaun orsamentu tinan 2022 tuir prioridade nasionál neen a’as liu mak iha setór produtivu hanesan agrikultura no turizmu, ambiente no konektividade ho alokasaun 27%, abitasaun no inkluzaun sosiál 22%, boa governasaun 12%, dezenvolvimentu kapitál umanu 10%, dezenvolvimentu rurál 3% no dezenvolvimentu setór privadu 0,5%, funsionamentu mákina Estadu 18% no atividade seluk 8%.

Notísia Relevante: Xefe Governu agradese PN aprova Proposta Lei OJE 2022

Jornalista : Natalino Costa

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here