Governu hahú prepara karreta atu re-aloka vítima inundasaun iha Manleuana ba alojamentu provizóriu ka Kost. Imajen TATOLI/ Antonia Gusmão.

DILI, 03 janeiru 2022 (TATOLI)—Governu liuhosi Sekretaria Estadu Protesaun Sivíl (SEPS) hamutuk ho Autoridade Munisípiu Dili, kontinua realoka vítima inundasaun 04 abril ba munisípiu orijinál.

Notísia Relevante: Governu re-aloka ona vítima inundasaun 21 ba munisípiu orijinál

“Foin daudaun iha 22 fulan dezembru ne’e ita kontinua re-aloka tan vítima inundasaun hamutuk na’in10 ba munisípiu orijinál RAEOA no dadaun ne’e vítima hamutuk 41 mak fila ona ba sirania munisípiu orijinál,” Koordenadór Diresaun Nasionál Jestaun Risku Dezastre, Helio de Sousa Soares Paicheco, informa ba Agência Tatoli via telefónika segunda ne’e.

Tuir nia, vítima 41 ne’ebé fila ona ba munisípiu orijinál ne’e maihosi sentru evakuasaun lima (5), nune’e vítima iha sentru evakuasaun Metiaut mak la deside fila ba munisípiu orijinál, tanba balun deside hela iha Dili no balun hela iha “kost” hodi hein desizaun hosi Governu.

Hosi sentru evakuasaun lima ne’e, iha sentru evakuasaun EBC Hera hamutuk xefe familia tolu (3) mak deside fila ba munisípiu orijinál, Bedik hera ida (1), Rate Ain rua (2), Real Madrid 21 no kampu Don Bosco hamutuk 14.

Hosi vítima sira seluk, nia hateten, vítima balun deside fila ba munisípiu Dili, hanesan Metiaut iha xefe familia lima (5), EBC Hera iha rua (2), kampu Real Madrid 15 no Don Bosco iha Ualu (8).

“Nune’e, familia 13 ne’ebé hela iha sentru evakuasaun Kampu Dom Boscu sira la iha direitu ba rekoperasaun no osan mão de obra, tanba familia sira ne’e nia uma kondisaun di’ak no familia balun hela hamutuk ho familia, inklui balun hela iha kost, ne’ebé ita la fó apoia rekoperasaun, maibé ita so fó apoia emerjénsia ba sira,” nia informa.

Maske nune’e, iha familia vítima hamutuk 41 mak oras ne’e hela iha “Kost” hodi hein desizaun hosi Governu mak familia lima (5) iha Manleu, tolu (3) iha Metiaut, 24 iha Bedik Hera no familia sia (9) iha EBC Hera,” nia dehan.

Entretantu, hafoin inundasaun iha loron 04 abril 2021, ema hamutuk na’in34 mak mate no na’in14 mak lakon iha nível nasionál no mós familia hamutuk 30.322 mak afeta ba inundasaun, ne’ebé entre familia sira-ne’e iha familia 24.816 hosi munisípiu Dili no uma hamutuk 4.231 mak hetan estragus.

Hosi númeru ne’e, iha familia 130 mak hela iha sentru evakuasaun neen (6), ne’ebé kompostu hosi sentru evakuasaun Don Bosco iha vítima hamutuk 35 no hosi númeru ne’e iha familia 14 mak deside fila ona ba munisípiu orijinál no na’inualu (8) deside hela iha Díli inklui mós familia 13.

Nune’e, iha sentru evakuasaun Bedik Hera iha família 25, hosi númeru ne’e iha família ida (1) deside fila ba munisípiu orijinál no familia 24 sei mantein iha Hera hodi hein desizaun hosi Governu.

Iha sentru evakuasaun EBC Hera iha familia 14 ne’e, familia tolu (3) deside fila ba munisipiu orijinál no familia rua (2) deside hela iha Díli no mós familia sia (9) sei hein desizaun hosi Governu.

Iha sentru evakuasuan Kampu Real Madrid iha familia hamutuk 41 ne’e, famíli 21 deside fila ba munisipiu orijinál, familia 15 hela iha díli no lima (5) sei hein desizaun hosi Governu. Iha sentru evakuasaun Rate Ain iha familia hitu (7) maibé familia rua (2) fila ba munisipiu orijinál no lima (5) sei hein desizaun hosi Governu.

Enkuantu, iha sentru evakuasaun Restaurante Metiaut Víctoria ne’e, iha familia ualu (8) bo família lima (5) deside fila ba Díli no familia tolu (3) sei hein desizaun Governu.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here