Hospitál Nasionál Guido Valadares (HNGV). Imajen Tatoli/Egas Cristóvão.

DILI, 28 dezembru 2021 (TATOLI)— Iha períodu selebrasaun Santo Natál, Hospitál Nasionál Guidu Valadares (HNGV) liuhosi Departamentu Emerjénsia rejista pasiente na’in-155, hosi númeru na’in-rua mak mate.

Hosi pasiente na’in-155 ne’e maioria kazu moras dengue ne’ebé afeta ba labarik sira, infesaun pulmaun no kazu asidente tráfegu.

“Iha loron 24 kalan to’o mai 25 ne’e pasiente volume barak tebes ho kondisaun grave hamutuk 155, na’in moras dengue ba labarik sira ho tinan tolu mai karik no kazu infensaun pulmaun no kazu asidente tráfegu iha área Kuluhun mak ida mate fatin no ida seluk mate iha HNGV,’’ Xefe Interinu Médiku Emerjénsia HNGV, Amentinho Fernandes ba jornalista sira iha HNGV-Bidau, tersa ne’e.

Tuir dadus HNGV hatudu pasiente liuliu labarik ho idade tinan-tolu ne’ebé afeta kazu dengue, maioria hosi munisípiu Liquiça no Ermera.

Daudaun, HNGV laiha ona espasu liuliu kama atu akumula pasiente foun sira hodi baixa liuliu ba kazu dengue tanba fatin nakonu hotu inklui sala pediátria

“Kama la to’o ona ne’ebé bebé sira ne’e na’in rua ou nai’n tolu mak uza kama ida de’it, nune’e pasiente sira toba de’it iha areadór,” nia akresenta.

Xefe Departamentu internu ne’e dehan, HNGV atu fó alta ba pasiente sira presiza haree didiak nia kondisaun saúde, bainhira kondisaun seidauk di’ak nafatin halo tratamentu.

“Iha emerjénsia, ita tau kama ba adultu hamutuk 11 no pediatria sia no tau tan kama extra neen, maibé la sufienete nafatin  tanba volume pasiente aumenta, nune’e ami halo ona koordenasaun ho Ministériu Saúde hodi buka meiu atu rezolve,’’ nia garante.

Totál médiku ne’ebé mak iha sala emerjénsia HNGV hamutuk 40, Enfermeiru na’in-20 no médiku na’in-20.

Jornalista  : Felicidade Ximenes

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here