Renizia da Costa Neves (primeiru-lugar). Imajen/Mídia PR.

DILI, 29 dezembru 2021 (TATOLI)—Konkorente Renizia da Costa Neves sai primeiru lugar entre konkorente 12 ne’ebé kompete iha final kompetisaun festivál Arte no Kultura iha modalidade kompetisaun Múzika Rezisténsia ne’ebé mak hala’o iha studio TVE Timor, São Miguel, Comoro, iha 28 dezembru 2021.

Notísia Relevante: PR prezerva múzika rezisténsia liuhosi festivál

Xefe Kaza Sivíl Prezidénsia Repúblika, Francisco Maria de Vasconcelos. Imajen/Mídia PR.

“Ha’u hakarak hato’o ba ita-boot sira-ne’ebé mak hetan primeiru-lugar no segundu-lugar, ita-boot sira mak mellor iha epizódiu festivál tinan-2021. Sira-ne’ebé mak seidauk hetan, ne’e kestaun tempu de’it. Dezafiu ba ita-boot sira para atu buka di’ak liután,” Xefe kaza Sivíl Prezidénsia Repúblika, Francisco Maria de Vasconcelos, hateten liuhosi komunikadu imprensa ne’ebé agência Tatoli asesu, kuarta ne’e.

Iha nia intervensaun, Xefe Kaza Sivíl ne’e hateten festivál kultura mùzika rezisténsia parte ida hosi kumpromisu Prezidente Repúblika, Francisco Guterres Lú Olo, ho objetivu hodi haburas no hametin identidade nasionál.

“Festivál kultura múzika rezisténsia parte ida hosi kumprimisu Prezidente Repúblika nian, oinsá atu haburas no hametin identidade nasionál. Iha rezisténsia la’ós de’it ema lori kilat maibé lori arte, múzika no pintura hotu, halo rezisténsia ba ita-nia luta durante tempu naruk. Tanba ne’e, iha sosiedade ida iha karáteristiku rasik mak nia identidade, nia kultura rasik ba espresaun iha ninia arte sira,” nia dehan.

Iha faze finál ne’e, konkorente hamutuk na’in 12 mak kompete no hafoin sira-nia aprezentasaun hodi lori múzika sira-ne’e, ekipa juri deside tuir valór ne’ebé mak iha, ema na’in-neen (6) mak hetan valór diakliu hodi manán iha festival tinan-2021 no ema na’in-ida (1) mak manán hanesan kantór ka kantora favoritu. 

“Manán ka lakon la’ós objetivu primeiru liu. Maske ida ne’e importante, maibé importante liu oinsá atu haburas, hametin ita-nia identidade husi ita-nia kultura rasik. Prezidente Repúblika Francisco Guterres Lú Olo tau matan ba joven sira. Joven sira ne’e mak futuru ba nasaun. Joven sira ne’e mak sei habelar no hametin ita-nia rain rasik no ba mundu internasionál. Ita-boot sira hatudu ba joven sira rihun ba rihun iha Timor, katak ita-boot sira mak futuru ba rai ida-ne’e,” Xefe kaza sivíl hateten.

Imajen/Mídia PR.

Hosi konkorente na’in-12 ne’e, konkorente na’in-hitu (7) ne’ebé mak hetan valór di’ak no sai manán-na’in mak hanesan Renizia da Costa Neves (primeiru-lugar), Efigenia Z. Fernandes (segundu-lugar), Nikel dos Santos (Terseiru-lugar), Amancia J. de Araújo (kuartu-lugar), Lamberto T. dos Santos (Kintu-lugar), Adriano (sextu-lugar) no Isamara P. C. F. Alves (favoritu).

Konkorente timor-oan na’in-12 mak hanesan Graciela Ferreira R. Martins, Amancia Jeje da Silva do Rosario de Araujo, Efigenia Sejunha Guterres Fernandes, António Fernandes da Cunha, Bonosa Pinto Xavier, Renizia Fátima da Costa Neves, Nikel de Jesus dos Santos, Lamberto Tilman dos Santos da Costa, Isamara Princesa Maria Conceição Filipe Alves, Livania Maria Natalia Fernandes, Joanito Soares no Maria Angelita Imaculada dos Santos Moniz no konkorente ida mak sei bele hetan Wildcard.

Antes ne’e, timor-oan hamutuk ema na’in 121 mak tuir selesaun kompetisaun múzika rezisténsia tinan 2021 no na’in-30 mak selesionadu hodi tuir kompetisaun faze eliminasaun to’o semi-finál, ekipa juri deside na’in-12 mak avansa ba faze finál ne’ebé mak hala’o iha loron 28 fulan-dezembru 2021.

Kompetisaun ne’e realiza hosi Prezidénsia Repúblika no koperasaun hosi Sekretariu Estadu Juventude no Desportu, Sekretariu Estadu Arte no Kultura, Ministériu Administrasaun Estatal no TVE Timor.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here