Festivál Nasionál Arte no Kultura ne’ebé mak promove husi prezidente repúblika Imajen//Festivál Nasionál Arte no Kultura

DILI, 24 dezembru 2021 (TATOLI)-Diretór Jerál Prezidénsia Repúblika no hanesan Prezidente Komisaun Organizadora, Domingos Amaral hateten, Prezidente Repúblika (PR) realiza festivál kompetisaun múzika rezisténsia liuhosi arte no kultura ho objetivu atu prezerva múzika rezisténsia sira.

Nia hatutan, festivál arte no kultura ne’ebé realiza iha tinan ida ne’e bá dala-rua hodi reflete kompromísiu Prezidente Repúblika nian ne’ebé hakarak atu hametin Timor-Leste nia identidade kulturál liuhosi talentu múzika hodi dezenvolve foin sa’e sira-nia talentu.

“Tanba ida ne’e kompromísiu PR ne’ebé kompromete ba povu katak bainhira nia sai PR sei hametin identidade nasionál liuhosi arte no kultura, hodi hasa’e nasionalizmu no patrotizmu ita-nia joven sira nian, hodi prezerva mós ita-nia múzika rezisténsia ne’ebé mak hanesan bukae ida” Domingos Amaral ba Agência Tatoli liuhosi telefínika sesta ne’e.

Prezidente komisaun organizadora ne’e dehan, joven sira presiza hatene múzika rezisténsia tanba múzika sira ne’e sai hanesan bukae ida ne’ebé fó hela bá jerasaun foinsa’e atu hanoin nafatin katak uluk múzika rezisténsia sira ne’e mak fó korajen ba luta na’in sira iha tempu uluk.

“Tanba ita hakarak hametin ita-nia kultutra liuhosi mós múzika tanba múzika kulturál mós bele identifika moris povu ida la hanesan povu,” nia dehan.

Nune’e iha kompetisaun múzika iha ámbitu festivál nasionál arte no kultura ne’e múzika ne’ebé konkorrente tenke kanta iha kompetisaun ne’e mak ho títulu “30 agostu”.

“Iha kompetisaun ne’e múzika rezisténsia ne’ebé komisaun organizadora deside obrigatóriu kompetitór sira sei lori iha kompetisaun mak múzika ho ninia títulu “30 agostu” bainhira manan mak katan fali múzika reziténsia sira seluk,” nia haktuir.

Nia eslarese, kritériu ne’ebé konkorrente sira atu tuir kompetisaun refere mak, fotokópia sertidaun RDTL ka kartaun Eleitorál no Billete Indentidade tahan ida (1), foto koloridu medida 3X4 tahan ida (1) no tenke iha kartaun vasina COVID-19, idade hahú hosi 15-30

Nia dehan, totál konkorrente ne’ebé rejistu atu tuir kompetisaun hamutuk 121, hosi faze edisaun na’in 60 mak liu, iha faze eliminasaun na’in 30, ba faze meiu finál 12, bá finál na’in neen (6) mak sei hetan prémiu.

“Prémiu ne’ebé ita prepara mak osan no tasa, maibé montante osan ita seidauk bele fó sai,” nia dehan.

Komptisaun refere, iha juri na’in tolu no mentór na’in tolu, hanesan juri mak, José Manuel Smith, Eugénsia Matos da Costa, Victor Maia, no mentór mak José Carlos de Oliveira, Adelis Cruz no Mito Freitas nune’e iha mós favóritu hili hosi haree-na’in sira wild card ida.

Nune’e kompetisaun múzika refere tuir planu finál iha loron 28 dezembru ne’ebé ne’ebé sei hetan partisipante direita hosi Prezidente Repúblika, Xefe Kaza Sivíl, inklui membru Governu balu.

Tanba ne’e nia apela ba joven sira ne’ebé iha talentu múzika lalika hanoin mete problema, maibé prepara aan didi’ak hodi dezenvolve talentu liuhosi kompetisaun múzika sira. “Hatudu ba mundu katak ita mós bele,” nia dehan.

Atividade ne’e realiza tanba servisu hamutuk entre PR ho Governu liuhosi Ministériu Edukasaun Juventude no Desportu (MEJD), reprezenta hosi Sekretáriu Estadu Juventu no  Desportu (SEJD), Ministériu Ensinu Superiór Siénsia no Kultura (MESSK) liuhosi Sekretáriu Estadu Arte no Kultura (SEAK) Ministériu Administrasaun Estatál (MAE), Ministériu Turizmu Komérsiu Indústria (MTKI), Ministériu Asuntu Parlamentár Komunikasaun no Sosiál (MAPKOMS).

Nia hatutan, kompetisaun refere orsamentu mai hosi Gabinete Prezidente Repúblika rasik, no Sekretária Estadu Juventude no Desportu (SEJD), maibé servisu ba atividade tomak ne’e SEAK.

Jornalista : Arminda Fonseca

Editór : Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here