Lider Karismatiku, Kay Rala Xanana Gusmao, sai sasin ba kazu publikasaun relatoriu investigasaun KJP Dioseze Dili. Imajen/Natalino Costa

DILI, 28 dezembru 2021 (TATOLI)— Tribunál Distritál Dili (TDD), tersa ne’e, kontinua hala’o julgamentu ba Arguidu ho inisiál Padre HFG no rona mós deklarasaun hosi sasin, Eis Prezidente Republika, Kay Rala Xanana Gusmão ba prosesu providénsia kautela kona-ba públikasaun relatóriu investigasaun Komisaun Justisa no pás (KJP) Dioseze Dili.

Arguidu HFG, antes ne’e nuudar Diretór ba Komisaun Justisa no Pás (KJP) Dioseze Dili ne’ebé hala’o iha Agostu 2020, halo investigasaun ba kazu Topu Honis, kona-ba kazu pedofilia ne’ebé envolve kondenadu Richard Dasbach no visum ba orfaun sira.

Notísia relevante:  Xanana, sasin iha Tribunál ba relatóriu KJP Dioseze Dili

Nune’e, Tribunál Distritál Dili, notifika Eis Prezidente Republika, Kay Rala Xanana Gusmão nuudar sasin ba públikasaun relatóriu investigasaun KJP ne’ebé konsidera segredu justisa, maibé iha ona publika ona públiku.

Eis Prezidente Republika. Kay Rala Xanana Gusmao. imajen/Natalino Costa.

“Ha’u simu duni ralatóriu hosi arguidu HFG, ne’e depois lee tiha ha’u sente isin fulun hamrik, tanba ne’e ha’u entrega fali relatóriu ne’e ba iha senhor ho inisiál JF no nia ba entrega fali ba senhora inisiál B.  Ha’u fó dokumentu ne’e senhor JF ho intensaun atu haree didi’ak konteudu hosi relatóriu ne’e, hodi ami bele diskute hamutuk hodi foti nia pozisaun liuliu kona-ba ba visum ba labarik sira iha Oé-cusse ne’ebé hanesan krime boot,” Sasin Xanana Gusmão, deklara iha TDD-Dili.

Xanana Gusmão dehan relatóriu investigasaun ne’e entrega de’it ba senhor ho inisiál JF, maibé lahatene derepente hetan publikasaun ona.

“kona-ba relatóriu ne’e publika sai ba iha publiku, la’ós ha’u mak públika no ha’u laiha koneisementu, tanba ne’e mak sasin (Xanana Gusmão) mós husu Polísia Sentifika Investigasaun Kriminál (PCIC,sigla portugés) atu halo investigasaun kona-ba se mak publika relatóriu ne’e,” Xanana Gusmão afirma.

Tanba, Xanana Gusmão mós hatene no komprende relatóriu investigasaun ne’e hanesan segredu justisa no laiha dalan ka labele públika sai.

Hafoin, rona tiha deklarasaun hosi sasin Kay Rala Xanana Gusmão, Tribunál Distritál Dili (TDD) deside  adia julgamentu ba loron 13 Janeiru 2022 hodi rona sasin seluk.

Audensia Julgamentu ne’e, preside hosi juis singulár Argentino Belo, Ministériu Públiku reprezenta hosi Matias Soares no Arguidu hetan asisténsia hosi advogadu privadu, Miguel Faria.

Notísia relevante:  Tribunál husu Dioseze Dili rekolla dokumentu relatóriu KJP

Jornalista  : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here