Kay Rala Xanana Gusmão, sai sasin iha TDD, sesta (30/10/2020). Imajen Tatoli/António Gonçalves

DILI, 30 outubru 2020 (TATOLI)- Tribunál Distritál Dili (TDD), ohin, notifika Komandante ein-Xefe FALINTIL, Kay Rala Xanana Gusmão, hanesan sasin ba prosesu providénsia kautela kona-ba publikasaun relatóriu Komisaun Justisa no Paz (KJP) Dioseze Dili.

Notísia Relevante : Amu Maubere ho Xanana no sarani sira reza ba Juiz sira iha TDD

Labarik sira kaer spanduk iha TDD. Imajen Tatoli/António Gonçalves

Kazu ne’e rejistu ho númeru  NUC 0278/20 CV/ TDD ne’ebé aprezenta hosi  JU,S (Juridico-Social Consultoria) ba  Ministériu Públiku iha loron 29 setembru 2020 ho karater urjénsia hodi bolu  sasin importante, kompostu hosi  Arsebispu ba Arquidioseze Dili, Mgr. Virgílio do Carmo da Silva, SDB, lider karizmátiku Xanana Gusmão, no Padre  Hermínio de Fátima Gonçalves, eis diretór  KJP Dioseze Dili.

Amu Hermínio de Fátima Gonçalves, deklara  relatóriu ne’e rasik nia mak halo, maibé nia hafodak no laiha koñesimentu kona-ba aktu divulgasaun relatóriu ne’ebé ema públika iha média sosiál Facebook.

Padre rasik deklara, relatóriu ne’e  nia hakerek entrevista mós Xanana hodi fó opiniaun iha relatóriu  kona-ba prosesu justisa ne’ebé seidauk la’o ho loloos iha Timor-Leste.

Relatóriu ne’e bainhira halo tiha, haruka uluk ba Don Virgílio do Carmo da Silva, SDB hafoin simu tan pedidu hosi Xanana Gusmão.

Kay Rala Xanana Gusmão iha sala audiénsia julgamentu ne’e deklara, konteúdu hosi relatóriu ne’e rasik deskreve kona-ba kazu ne’ebé antes ne’e akontese iha uma mahon Topu Honis, Oe-Cusse. Maibé relatóriu ne’e rasik la’ós sai konsumu públiku, maibé konfidensiál.

Xanana lia tun dehan, nia parte husu relatóriu ne’e hosi KJP atu konfirma loloos kona-ba faktu sira ne’ebé konsulta iha relatóriu ne’ebé iha.

Kay Rala Xanana Gusmão, ko’alia ba jornalista sira bainhira sai sasin iha TDD. sesta (30/10/2020). Imajen Tatoli/António Gonçalves

“Ha’u mai hodi sai testemuña ba kazu ida kona-ba publikasaun relatóriu Komisaun Justisa no Paz ne’ebé halo ema hotu hakfodak. Ha’u fiar katak, relatóriu ne’e la’ós Padre Hermínio mak públika, tanba ha’u rasik mós simu relatóriu ne’e hodi ha’u hato’o hanoin kona-ba kazu ne’ebé ha’u sente katak, ladún tuir dalan loloos bainhira ita halo investigasaun ba justisa,” Xanana esklarese ba jornalista sira.

Xanana fiar katak, ho deklarasaun ne’ebé nia parte inklui ho Don Virgílio no Padre Hermínio hato’o bele hetan solusaun ba problema justisa iha rai-laran.

Tuir Xanana nia haree, ohin loron Timor-Leste iha problema boot ba sistema judisiáriu, tanba kazu boot barak akontese, autór judisiáriu sira la prosesa hodi halo kazu barak arkiva de’it.

“Ha’u prontu nafatin atu mai hatán ba justisa. Ita nia rain sistema justisa fraku uitoan, tanba ha’u nia membru governu barak tama ona kadeia sai ona, maibé kazu boboot ita la book, ne’ebé ita dehan atu fiar justisa ne’e tenke halo tuir justisa ida loloos,” Xanana afirma tan.

Iha audiénsia julgamentu ne’e, Don Virgílio do Carmo da Silva, SDB, la marka prezensa tanba seidauk simu despaxu husi Núnsiu Apostóliku.

Iha parte hanesan, defeza ba rekerente Hildegar Wondeng hateten, prosesu ne’e rasik parte rekerente husu Tribunál rekolla fali relatóriu ne’ebé Komisaun Justisa no Paz elabora ona.

Hosi sorin seluk, advogadu privadu hosi JU,S, Olívio Barros Afonso dehan, sira rasik hato’o keixa kona-ba relatóriu publikasaun  Komisaun Justisa no Paz hanesan providénsia kautela ne’ebé labele sirkula ba ema seluk atu hatene.

“Ami halo asaun mai Tribunál ne’e hanesan medida providénsia kautela, katak asaun ne’ebé ita halo atu evita ninia prejuízu balun ka lezaun balun ba direitu ema ka organizasaun ruma ninia direitu balun haree katak, ameasadu hosi ema seluk nia hahalok ne’ebé relasiona ho Komisaun Justisa no Paz nia relatóriu espalla ona iha media públiku,” nia hateten.

Olívio hateten, relatóriu ne’ebé Komisaun Justisa no Paz halo tuir loloos ninia konteúdu tenke segredu, maibé relatóriu ne’e fó sai fali iha média sosiál hodi akuza no minimiza fali servisu profisionál ne’ebé organizasaun JU,S  hala’o.

“Ami haree relatóriu ne’e kestiona fila fali servisu profisionál ne’ebé organizasaun JU,S hala’o. Se servisu ne’ebé ami hala’o laloos, ne’e hanesan prosesu ketak ida, nia tenke lori prosesu ba Ministériu Públiku dehan, ami maka esplora fali labarik sira hodi dehan organizasaun hala’o servisu laloos,” nia lamenta.

JU,S nu’udar organizasaun sosiál ida ne’ebé sai mahon ba servisu advogadu privadu sira nian hodi tau matan  no fó asisténsia labarik sira ne’ebé sai vítima ba violasaun seksuál no servisu apoiu sosiál no advokasia ba vítima sira.

Audiénsia julgamentu ne’e   prezide hosi juíza singular Edite Palmira parte rekerente hetan asisténsia hosi advogadu privadu na’in rua, no referidu hetan asisténsia hosi advogadu na’in rua.

Padre Parókia Sagrado Coracação de Jesus, Becora, Dioseze Dili, Amu Domingos da Silva “Maubere” . Imajen Tatoli/António Gonçalves

Iha fatin hanesan, Amu Domingos Maubere dehan, Igreja Katólika lamenta tebes, bainhira Tribunál Distritál Dili notifika o Don Virgílio atu ba hatán iha Tribunál.

“Don Virgílio do Carmo da Silva, SDB simu notifikasaun ida mai Tribunál  atu hatán kona-ba keixa ne’ebé hato’o hosi ONG JU,S ne’ebé ligadu ho kazu ne’ebé akontese iha Oe-Cusse iha vítima labarik sira sente hanesan vítima ba investigasaun ne’ebé  ONG sira halo hamutuk ho Governu,” Amu Domingos Maubere hateten.

Amu Maubere hatutan, relatóriu ne’ebé Komisaun Justisa no Paz halo reprezenta Igreja Katólika atu defende direitu labarik sira nian  no la’ós atu akuza fali grupu ruma ninia servisu.

“Kazu ne’e ba labarik na’in 30-resin ne’ebé sira sente hanesan vítima ba investigasaun hosi ONG JU,S. Tanba ne’e amu Bispu husu deskulpa hodi hasai tiha Padre Hermínio hosi Komisaun Justisa no Paz,” nia tenik.

Tuir Padre Domingos Maubere, lider karizmátiku, Kay Rala Xanana Gusmão no Amu Hermínio mós sai sasin ba Tribunál atu fó sira-nia deklarasaun hodi defende lia-loos ba servisu Igreja Katólika nian ne’ebé dezde uluk too agora defende labarik oan-kiak sira-nia direitu bainhira hetan injustisa ruma.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here