DILI, 28 dezembru 2021 (TATOLI)–Universidade Nasionál Timor-Lorosa’e (UNTL) adia seremónia graduasaun ba loron 11 janeiru 2022 tanba seidauk hetan informasaun hosi Ministériu Ensinu Superiór Siénsia no Kultura (MESSK), ne’ebé antes ne’e atu realiza iha loron 28 dezembru 2021.
Vise-Reitór UNTL ne’ebé trata asuntu akadémiku no garantia kualidade, Samuel Venâncio de Sousa Freitas, konsidera tinan ne’e sira la konsege realiza planu rua ne’ebé trasa ona, hanesan graduasaun no orientasaun akadémiku ba estudante tinan akadémiku 2021 tanba seidauk hetan despaisu hosi ministériu.
“Ita labele halo buat ida kuandu la hetan autorizasaun hosi parte Governu liuhosi Ministériu Ensinu Superior Siénsia no Kultura, tanba to’o agora ita la hetan despaisu ida atu realiza eventu rua ne’e,” Vise-Reitór UNTL hateten iha kampus sentrál, tersa ne’e.
Tuir Samuel, tempu ne’e apertadu liu no to’o agora laiha rezultadu, nune’e parte universidade deside adia no labele realiza eventu importante rua ne’ebé planeia ona.
Notísia relevante: UNTL sei realiza eventu importante rua molok tinan ne’e ramata
Ho nune’e, parte reitoria UNTL nian tuur hamutuk hodi deside seremónia graduasaun ba estudante finalista 642 ho grau akadémiku lisensiatura tenke adia ba tinan oin.
Estudante finalista sira kompostu hosi fakuldade ualu hanesan Agrikultura, Siénsia Sosiál, Direitu, Ekonomia no Jestaun, Edukasaun Arte Umanidade, Enjeñaria Siénsia no Teknolojia, Filozofia Siénsia Umana, no Medisina Siénsia no Saúde, enkuantu fakuldade Siénsia Ezata tinan ne’e laiha estudante ida maka atu gradua.
Seremónia graduasaun ne’e fahe ba parte rua, dadeer no lorokraik iha Sentru Konvensaun Dili (CCD, sigla portugés) no salaun Hera.
Jornalista : Tomé Amado
Editora : Julia Chatarina
