Fakuldade Edukasaun Arte Umaniora, Departementu Lian Inglés hosi Universidade Nasional Timor-Lorosa’e. Imajen/UNTL

DILI, 04 novembru 2021 (TATOLI)—Vise-Reitór Universidade Nasionál Timor-Lorosa’e (UNTL) ne’ebé trata asuntu akadémiku no garante kualidade, Samuel Venâncio Freitas, hateten, molok tinan ne’e ramata, sei iha eventu importante hanesan graduasaun no orientasaun akadémiku ba estudante tinan akadémiku 2021.

“Atividade sira ne’e tenke realiza tanba estudante finalista sira hosi UNTL no Instituto Nacional de Formação de Docentes e Profissionais da Educação de Timor-Leste (INFORDEPE) preparadu atu simu graduasaun inklui estudante tinan akadémiku 2021 ne’ebé seidauk hetan orientasaun akadémiku, nune’e tinan oin bele foku de’it ba estudante foun sira,” Vise-Reitór informa iha ninia knaar fatin, kampus UNTL, kinta ne’e.

Tuir Samuel Venâncio, bainhira UNTL konsege realiza eventu rua ne’e, maka iha graduasaun ho númeru boot tebes tanba estudante provizóriu iha semestre ikus hamutuk 600-resin inklui formandu INFORDEPE hamuruk 2.000-resin maka preparadu ona.

“Kuandu númeru graduadu barak, konserteza graduasaun mós sei fahe ba grupu, tanba formadu INFORDEPE 2.000-resin, ne’ebé sei labele halo dala-ida de’it, maibé sei fahe tuir loron inklui mós estudante finalista UNTL 600-resin  bele uza tempu dadeer no lorokraik,” nia akresenta.

Maski nune’e, Vise-Reitór dehan, atu konkretiza depende ba esforsu UNTL atu aselera prosesu graduasaun, tanba regra atu selebra eventu graduasaun, importante maka dadus estudante tenke submete fulan-ida antes ba Ministériu Ensinu Superiór Siénsia no Kultura (MESSK) hodi hetan konsiderasaun.

“Signifika hahú novembru ne’e, universidade submete ona lista graduandu nian ba ministériu, konserteza graduasaun sei realiza iha dezembru,” nia tenik.

Enkuantu, UNTL trasa hela planu atu realiza orientasaun akadémiku iha fulan-dezembru, ne’ebé tuir regra atividade orientasaun hahú iha inísiu estudante sira tama iha UNTL, maibé atividade ne’e labele realiza tanba situasaun COVID-19.

“Ne’e duni ami analiza situasaun no deside bele realiza iha dezembru tinan ne’e ho durasaun tempu loron rua de’it. Ita tau prioridade ba orientasaun tanba hanesan regra akadémiku, ne’e duni ita esforsu sira tenke hetan tiha orientasaun,” nia salienta.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here