Ministériu Justisa no Ministériu Solidaridade Sosiál no Inkluzaun (MSSI) selebra festa Natál hamutuk ho prizonéiru sira iha Becora, loron tersa (28/12). Imajen TATOLI/Francisco Sony

DILI, 28 dezembru 2021 (TATOLI)–Ministériu Justisa (MJ) ho Ministériu Solidaridade Sosiál no Inkluzaun (MSSI), tersa ne’e, selebra natál no tinan foun, hamutuk ho dadur sira iha Prizaun Becora.

Ministru Justisa, Manuel Cárceres da Costa. Imajen TATOLI/Francisco Sony

Biban ne’e, Ministru Justisa, Manuel Cárceres da Costa, hateten, objetivu selebra loron-boot hamutuk ho prizioneiru sira tanba MJ ho MSSI hanesan parseiru, ne’ebé kada tinan lolo-liman hamutuk hodi tau-matan ba maluk sira ne’ebé kumpre hela pena iha prizaun Becora, Gleno no Suai.

“Ita simu natál hanesan roman, ne’ebé roman ne’e la’os mai hosi loro-matan no fitun, eletrisidade de’it, maibé roman natál loloos mak roman ne’ebé Nai Maromak fó ba ita atu sai roman iha ita-nia maluk sira-nia leet,” Ministru hateten liuhosi ninia diskursu iha Prizaun Becora.

Notísia relevante: Janeiru-setembru dadur 101 livre kondisionál

Ministru konsidera loron-boot ne’e hanesan esperansa, nune’e bainhira loron ruma dadur sira fila ba família karik bele lori esperansa hodi fó tutan ba maluk seluk.

”Tanba imi lori roman ba mundu no hanesan ajente rekonsiliasaun, paz, no transformasaun iha sosiedade timor-oan. Tanba natál husu ita halo reflesaun no hanoin kle’an iha ulun no kakutak, tanba hanensan dalan ba ita atu dame ho an rasik. Atu tama tinan foun tenke kontrola emosaun no hahalok tanba iha moris foun no esperansa foun, ne’ebé hein hela mudansa komportamentu, tanba bainhira laiha mudansa komportamentu no pensamentu, susar tebes ba Ministériu Justisa ho ninia pesoál sira atu fó relatóriu atu tulun habadak tempu iha prizaun,” nia dehan.

Iha fatin hanesan, Diretór MSSI, Rui Exposto, lori MSSI nia naran agradese tanba selebra loron boot ho prizioneiru sira.

“Falta loron hirak tan atu ramata tinan ne’e, ha’u husu maluk prizioneiru sira atu reflete-an saida mak ita halo ona durante ne’e no saida mak ita atu halo iha tinan oin, tanba natál lori dame mai ita, família ida-idak no komunidade,” nia akresenta.

Diretór Nasionál Estabelesimentu Prizaun Becora, João Domingos, dehan, nia parte kontente tebes tanba maski iha loron-boot ne’e dadur sira la selebra hamutuk ho familía, maibé ho prezensa MJ no MSSI hanesan selebra ona hamutuk ho família.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here