Diretór Estabelesimentu Prizaun Becora, João Domingos. Imajen Tatoli/Dok.

DILI, 15 setembru (TATOLI)—Hahú hosi janeiru to’o setembru tinan ne’e, dadur iha estabelesimentu prizionál Becora hamutuk na’in 101, hetan liberdade kondisionál.

Dadaur hirak-ne’e, tuir aprosimasaun hosi prizaun, hatudu komportamentu di’ak arrepende ho hahalok bainhira kumpre pena, nune’e junta ho relatóriu aprezenta ba Tribunál, hodi husu no deside hetan liberdade kondisionál.

Notísia relevante:Prizaun Becora suspende vizita família

“Durante iha prizaun laran dadur hirak-ne’e partisipa formasaun hosi  prizaun no sosiedade sivíl, hanesan karpintaria, pedreiru, suku, espirituál no seluk tan hodi forma no muda mentalidade di’ak, tanba prizaun hanesan fatin reflesaun, nune’e bainhira re-integra ba komunidade bele kontribui ba dezenvolvimentu,” Diretór Estabelesimentu Prizionál Becora, João Domingos, hateten ba jornalista Agência Tatoli, iha Dili, kuarta ne’e.

Durante situasaun pandemia COVID-19 besik tinan rua ona, formasaun sira-ne’e labele kontinua tanba limita vizita no redús atividade hotu.

Tuir dadus, to’o 14 setembru prizaun Becora  iha dadur hamutuk ema na’in  517, kompostu hosi  prizaun  kondenadu 406 no prizaun  preventiva  111, ho númeru ne’e tuir estatístika komete kazu númeru aas maka  omesídiu no tuir maka violasaun seksuál.

Reativa vizita família

Prizaun Becora mós hahú reativa vizita família bazeia ba desizaun Konsellu Ministru (KM) iha 08 setembru, ne’ebé hakotu ona impozisaun konfinamentu domisiliáriu jerál iha munisípiu Dili, iha 09 setembru.

Hosi ida-ne’e estabelesimentu Prizionál Becora husu permisaun ba Ministru Justisa (MJ), Manuel Cárceres da Costa, atu loke vizita família ba populasaun prizionál.

Maski Ministru Justisa fó ona autorizasaun ba vizita família hahú 13 setembru, maibé husu nafatin atu ema hotu-hotu tenke sujeita ba regra Organizasaun Mundiál Saúde (OMS) ho Ministériu Saúde (MS) no aprezenta kartaun vasina primeira doze ka segunda doze.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here