DILI, 28 dezembru 2021 (TATOLI)—Ministru Asuntu Kombatente Libertasaun Nasionál (MAKLN), Julio da Costa ‘Meta Malik’, tersa ne’e, relata progresu konstrusaun uma veteranu ba veteranu sira-ne’ebé partisipa iha luta tinan 20-24 ba Prezidente Repúblika, Francisco Guterres ‘Lú-Olo.
Notisia Relevante: MAKLN sei aloka osan $2,400,000 konstrui uma 60 ba veteranu
“Ohin msi informa ba Prezidente Raepúblika kona-ba situasaun atribuisaun konstrusaun uma veteranu tinan 20-24 ne’ebé hala’o iha tinan 2020 to’o agora. Atribuisaun ne’e ho osan montante rihun $40 kada veteranu ba konstrusaun uma. Hanesan ita hatene ami atribui ona ba totál veteranu 118 no la konsege hotu. Agora hela de’it ida hosi Lacluta,” Ministru ba Asuntu Kombatente Libertasaun Nasionál ne’e hateten ba jornalista sira hafoin ramata sorumutu ho Xefe Estadu iha Palásiu Prezidensiál Nicolau Lobato, Bairru Pite, Dili, tersa ne’e.
Tuir planu ministéiru nian, ba tinan oin faze daruak sei atribui mós konstrusaun uma ba veteranu 100-resin ho grau 15-19 maibé ho fazeadamente sei atribui uluk ba veteranu 30-resin no sei haree ba hotu-hotu ho kada uma kustu orsamentu rihun $35,” nia informa.
Notisia Relevante: MAKLN sei aloka osan $2,400,000 konstrui uma 60 ba veteranu
MAKLN nia planu, bainhira harii hotu ona uma veteranu ba veteran sira ho grau 15-19 sira-ne’e mak sei kontinua haree mós veteranu dezmobilizadu ho grau 8-14 ne’e.
Aleinde ne’e, Meta malik mós informa ba Xefe Estadu kona-ba verifikasaun dadus veteranu rejistadu iha 2009 ne’ebé ninia prosesu verifikasaun iha territóriu nasionál ne’e foin atinje 40%-resin.
Nune’e mós hatoó ba Prezidente Repúblika kona-ba planu asaun MAKL nian liuhosi Sekretária Estadu ba Asuntu Kombatente Libertasaun Nasionál, tinan ne’e harii monumentu ne’ebé la’o hela iha postu administrativu sira iha territóriu Timor-Leste.
Iha enkontru ne’e, Meta Malik hato’o mós kona-ba fundu veteranu ne’ebé koa $30 hosi veteranu sira kada fulan, ne’ebé durante tinan rua liu-ba to’o agora kuaze atinje ona millaun $20.
Durante sorumutu, Xefe Estadu ho Ministru iha rekomendasaun barak ko’alia kona-ba problema veteranu esensiál tebes ligadu ba pensaun martir no veteranu ne’ebé kada tinan Estadu gasta millaun $80-resin.
Nia dehan, bainhira dadus verifikasaun hosi veteranu ne’ebé rejistadu 2009 nian mak mai tán ho previzaun aumenta 50% ruma mak sei gasta aumenta millaun $200-resin, bele fó todan ba sustentabilidade fundu mina rai.
Notisia Relevante: Benefisiáriu 28.558 maka Simu ona Pensaun Veteranu
Jornalista : Nelson de Sousa
Editór : Cancio Ximenes
