Prezidente Konsellu Veteranu, Vidál de Jesus ‘Riak Leman’. .Imajen TATOLI/Antonio Goncalves.

DILI, 25 agostu 2020 (TATOLI)-Prezidente Konsellu Veteranu, Vidal de Jesus “Riak Leman”, hateten Ministériu Asuntu Kombatente Libertasaun Nasionál (MAKLN)  sei aloka osan $2,400,000 hodi konstrui uma 60 ba veteranu na’in-60.

Notísia Relevante: Veteranu la falsu maibé ema mak falsifika dokumentu

“MAKLN  sei aloka osan $2,400,000 hodi konstrui uma 60 ba veteranu na’in-60 ho alokamentu orsamentu rihun $40 ba kada uma ida ba veteranu ida. Maibé hein de’it bainhira orsamentu aprova ona sei implementa planu halo uma ba veteranu sira ne’ebé mak luta durante tinan 24 nia laran iha ai-laran,” dehan Prezidente Konsellu Veteranu, Vidal de Jesus “Riak Leman”, ba Agência TATOLI iha nia knaar fatin SERVE, Obrigado-Barak, Madaoru, Dili, tersa ne’e.

Reak Leman hateten, haree ba realidade no situasaun Timor-Leste nian entaun sei haree uluk ba veteranu tinan 24 luta iha ai-laran tanba durante tinan 24 ne’e sira dedika-aan tomak ba funu ida-ne’e to’o hetan independénsia.

“Ita la ko’alia ba sofrimentu, sakrifísiu no terús  hira mak sira enfrenta iha ai-laran. Tanba ne’e, ha’u hanoin ita rezolve uluk veteranu sira tinan 24 luta iha ai-laran ne’e, depois bainhira estadu iha ona kbiit tan mak bele kontinua ba veteranu sira seluk,” Vidal de Jesus “Riak Leman” hateten. 

Funu ne’e, Riak Leman haktuir, ema hotu-hotu mak halo funu la’ós de’it FALINTIL mesak, frente klandestina no frente diplomatika sira de’it mak halo funu maibé ema hotu nia partisipasaun no kontribuisaun mak ohin loron Timor-Leste hetan independénsia ida-ne’e.

“Maibé ita mós tenke hatene entre ema hirak ne’ebé mak halo funu no halo sakrifísiu ba rai ida0ne’e. Atende uluk ida terús liu no ne’ebé mak laiha duni fatin hodi hela,” nia informa.  

Nia dehan, Orsamentu Jeral Estadu (OJE) mak la xumba iha PN karik, oras-ne’e planu halo uma veteranu 60 ne’e halo tiha ona. Tanba, tuir nia, buat hotu-hotu depende ba orsamentu estadu maibé Governu hanoin ona atu tau osan ba konstrusaun uma ba veteranu tinan 24 luta iha ai-laran.

“Ho nune’e, husu para OJE ba tinan ne’e tenke pasa para ita halo uma ba veteranu sira tinan 24 luta iha ai-laran, tanba veteranu ne’ebé mak luta ba funu ne’e barak mak uma laiha no balun ba ku’a-tua no hein karau. Situasaun ida-ne’e mak ita-nia veteranu sira enfrenta loro-loron tanba ne’e mak presiza halo uma ba sira,” nia dehan.

Nia informa, veteranu sira ne’ebé luta tinan 24 nia laran iha ai-laran hamutuk na’in-98 no hosi ema sir- ne’e barak liu mak hosi rejiaun I Lospalos, tuir mak rejiaun II Viqueque, Baucau no seluk tan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here