Kondisaun Eskola Bázika Filiál Santa Teresinha Quelicai grave. Imajen TATOLI/Joanico de Araújo

DILI, 28 dezembru 2021 (TATOLI)–Diretór Jerál Administrasaun Finansa hosi Ministériu Edukasaun Juventude no Desportu (MEJD), Antoninho Pires, relata, konstrusaun no reabilitasaun eskola 197 iha territóriu nasionál sei realiza iha tinan oin.

“Prosesu transferénsia osan ba projetu komunitáriu, to’o horisehik tama hotu ona ba konta bankária grupu komunitáriu sira-nian no agora hein de’it faze implementasaun iha janeiru 2022,” Diretór Jerál Administrasaun Finansa hateten iha salaun MEJD, Villa verde, tersa ne’e.

Antes ne’e, MEJD hamutuk ho Diretór Eskola hosi munisípiu 12 asina kontratu ba konstrusaun no reabilitasaun eskola 197 no sala aula 651 iha territóriu tomak ho orsamentu $20.274.586,97.

Notísia relevante: Eskola 197 asina ona kontratu projetu komunitáriu hadi’a eskola

Tuir Antoninho Pires, maski orsamentu transfere ona ba konta bankária grupu komunitáriu sira nian, maibé labele naran foti tanba konstrusaun fíziku tenke atinje ona 25% maka foin foti tuir faze.

“Iha orsamentu adiantamentu 20% ne’ebé ministériu prepara ba grupu komunitáriu sira atubele uza hala’o prosesu konstrusaun iha kada eskola sira tuir kontratu ne’ebé asina ona ho ministériu,” Diretór Jerál akresenta.

Tuir kalendáriu Diresaun Nasionál Dezenvolvimentu Parque Eskolár MEJD, loloos konstrusaun realiza ona iha dezembru tinan ne’e, maibé hasoru difikuldade iha prosesu sira.

“Ne’e duni konstrusaun tenke adia. Hein katak adiantamentu konstrusaun ne’e bele realiza duni bazeia ba informasaun ne’ebé fó sai ona,” nia dehan.

Jornalista : Tomé Amado   

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here