Primeiru-Ministru, Taur Matan Ruak, entrega sertifikadu ba pesoál liña frente iha ámbitu desmantela Sala Situasaun CIGC, iha CCD, kinta (23/12). Imajen/Mídia GPM

DILI, 23 dezembru 2021 (TATOLI)–Governu ofisialmente desmantela Sala Situasaun Sentru Integradu Jestaun Krize (CIGC, sigla portugés), maibé sei nafatin eziste ekipa kiik ida atu halo akompañamentu ba evolusaun COVID-19.

“Ita hakotu Sala Situasaun temporáriamente, tanba ita la hatene saida maka sei akontese iha tempu sira mai, tanba daudaun iha variante omicron ho ninia kapasidade kontájiu maibé óbitu ne’e menus, maibé se ita haree didi’ak iha país barak, daudaun hahú prepara-an ba lockdown, ne’e signifika situasaun ne’e inserteza loos,” Primeiru-Ministru, Taur Matan Ruak, hateten, iha ámbitu enserramentu Sala Situasaun iha Sentru Konvensaun Dili (CCD, sigla portugés), kinta ne’e.

Foin lalais, Governu liuhosi despaisu Primeiru-Ministru deside reativa Sala Situasaun CIGC ho objetivu atu reforsa serbisu Ministériu Saúde (MS) ba prevensaun COVID-19 iha Timor-Leste.

Despaisu Xefe Governu publika iha Jornál Repúblika, nune’e hahú loron 02 fevereiru 2021 reativa hikas Sala Situasaun.

Notísia relevante: Hahú ohin, Governu ofisialmente reativa Sala Situasaun

Xefe Ezekutivu rekoñese, serbisu sira hotu ne’ebé durante ne’e liña frente no públiku halo iha susesu boot, tanba bele kontrola moras ne’e rasik no evita ema labele mate barak liu.

Ho nune’e, Governu agradese ba esforsu profisionál saúde hotu inklui pesoál liña frente sira seluk ne’ebé presta serbisu ba prevensaun no mitigasaun pandemia.

Sei la eziste tan Estadu Emerjénsia

Biban ne’e, Xefe Governu deklara mós katak sei laiha tan Estadu Emerjénsia bainhira mosu COVID-19 ho variante foun.

“Diplomata estranjeiru sira balun husu ba ha’u, karik variante Omicron tama Timor-Leste sei iha Estadu Emerjénsia ka lae? ha’u dehan ba ha’u-nia-an de’it, katak Estadu emerjénsia laiha ona, bele mai a’at liu fali ida kotuk maibé kondisaun ne’e sei la aplika, maibé ita nafatin husu ba hirak ne’ebé seidauk vasina bele bá vasina. Sei fó livre ba ema hotu maibé apela nafatin ba komunidade buka klínika, postu saúde, ospitál no médiku sira atu hetan vasina,” PM Taur dehan.

Notísia relevante: PR promulga alterasaun Lei Sistema Saúde, Estadu la prezisa implementa EE

Xefe Ezekutivu apresia ho serbisu MS ba kampaña vasinasaun tanba daudaun ne’e prosesu vasinasaun la’o di’ak tebes.

Biban ne’e, Primeiru-Ministru mós entrega sertifikadu apresiasaun ba pesoál liña frente sira no simu relatóriu.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here