Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 02 fevereiru 2021 (TATOLI)–Governu liuhosi depaisu Primeiru-Ministru (PM), Taur Matan Ruak, deside reativa hikas Sala Situasaun, Sentru Integradu Jestaun Krize (CIGC, sigla portugés) ho objetivu ida atu reforsa servisu Ministériu Saúde (MS) ba prevensaun COVID-19 iha Timor-Leste.

Despaisu Xefe Governu ne’e sei publika iha Jornál Repúblika, nune’e hahú 02 fevereiru 2021 reativa hikas Sala Situasaun.

“Sei iha publikasaun tempu badak relasiona ho despaisu Primeiru-Ministru. Bazeia ba artigu 29 husi Lei Seguransa Nasionál no artigu 6 husi dekretu-lei númeru 24/2020 loke dalan atubele iha ativasaun funsionamentu CIGC nu’udar Sala Situasaun,” Ministru Prezidénsia Konsellu Ministru, Fidelis Manuel Leite Magalhães, relata liuhosi konferénsia imprensa iha Palásiu Governu, tersa ne’e.

Notísia relevante: Governu hakarak reativa hikas sala situasaun CIGC

Portavós Governu ne’e esplika, Sala Situasaun ne’e sei sede iha Dili  maibé ho kriasaun unidade territoriál, ne’ebé sei fahe ba unidade tolu iha Rejiaun Administrativa Espesiál Oé-cusse Ambeno (RAEOA) ho sentru operasaun iha Pante-Makassar, unidade territoriál Bobonaro ho sentru operasaun Maliana, no unidade territoriál Covalima ho sede operasaun iha Suai.

Hafoin publikasaun, despasu ne’e sei tama iha vigór hahú iha loron 02 fevereiru no tempu badak prepara hamoris fali CIGC no mós alarga tan sentru operasaun sira.

Iha loron 30 juñu 2020, Xefe Governu ofisialmente enserra servisu Sala Situasaun CIGC no entrega hikas koordenasaun serbisu ba MS hodi kontinua hala’o prevensaun no metigasaun ba surtu COVID-19.

Maski Sala Situasaun la funsiona ona maibé Gabinete Jestaun Krize ne’ebé tutela mós iha Gabinete Primeiru-Ministru (GPM) kontinua eziste no hala’o nafatin serbisu.

Jornalista: Antónia Gusmão

Editora: Julia Chatarina

1 KOMENTÁRIU

  1. HUSU APOIO MOS BA PARTE KOMPETENTE ATU SASAN NESECIDADES BASICO NEBE TRAVA HELA IHA FRONTEIRA MOTA AIN ATU NEE BELE FO FATIN BA SASAN HIRAK NE ATU TAMA MAI TIMOR.OBRIGADO

HAKEREK NO HATÁN

Please enter your comment!
Please enter your name here