Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 22 dezembru 2021 (TATOLI)–Ministru Prezidénsia Konsellu Ministru, Fidelis Manuel Leite Magalhães, informa, Governu sei kria dekretu-lei hodi transforma Sentru Arkivu Audivizuál Max Stahl (CAMSTL, sigla portugés) ba institutu públiku hodi kontinua legadu Saudozu.

“Ha’u rasik ko’alia ho Tom O’Haolain hosi CAMSTL atu nia konvoka membru sira halo reuniaun ho parte Governu, reuniaun ne’e la’o hela entre Gabinete Primeiru-Ministru ho sira ne’ebé halo diskusaun kle’an atu haree modelu di’ak liu no iha tempu badak nia laran bele avansa ho proposta dekretu-lei ne’ebé atribui estatutu loloos ba Sentru Arkivu atu garante kontinuasaun obra Max Stahl ba jerasaun sira ne’ebé sei mai no garante katak sustentável ba futuru,” Ministru hateten iha Palásiu Governu, kuarta ne’e.

Notísia relevante: Espoza Max Stahl husu Governu transforma CAMSTL sai institutu públiku

Governante ne’e dehan, inisiativa ne’e mosu ona diskusaun iha Konsellu Ministru desde Saudozu Max Stahl moras hela.

“Altura ne’ebá, ha’u rasik mak foti iha Konsellu Ministru, hafoin diskusaun ha’u rasik telefone kedan ba Saudozu nia espoza Ingrid Bucens hodi aprezenta Governu nia hanoin no hato’o mós ba Señor Ramos Horta. Governu hakarak garante kontinuasaun legadu liman fatin Max Stahl hodi benefisia jerasaun sira tuir mai, katak CAMSTL la mate,” Ministru dehan.

Tuir governante ne’e, presiza haree mós kona-ba instituisaun ninia autonomia no garante sustentabilidade.

“Preokupasaun ne’ebé ninia espoza Ingrid foti ne’e la ses malu ho preokupasaun Governu rasik, tanba ne’e ita koko atu rezolve iha tempu badak nia laran,” nia dehan.

Jornalista :  Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here