Espoza Max Stahl, ingrid Bucens. Imajen TATOLI/Anito Soares

DILI, 16 dezembru (TATOLI)–Espoza Saudozu Max Stahl, Ingrid Bucens, husu Governu transforma Sentru Audiovizuál Max Stahl iha Timor-Leste (CAMSTL, sigla portugés) sai institutu públiku.

“Durante ne’e Max Stahl serbisu ho ambisaun hodi kontribui ba Timor-Leste nia luta. Tanba ne’e, husu Governu hodi transforma CASMTL sai institutu públiku, nune’e Governu rasik bele tau-matan. Durante nia moris, konsege halo diálogu barak ho Governu troka ideia kona-ba asuntu ne’e,” Ingrid Bucens hateten ba Agência TATOLI, iha Muzeu Rezisténsia, kinta ne’e.

Aleinde ne’e, durante halo diskusaun ho timor-oan ne’ebé besik nia, Max Stahl hato’o dezeju CAMSTL hetan baze legál no família iha intensaun atu tau-matan ba eransa Saudozu ne’e iha Timor-Leste.

“Ita hatene ami mós hela iha ne’e iha tinan barak no ha’u fiar katak nia-oan sira balun hakarak atu kontribui ho CAMSTL,” nia akresenta.

Notísia relevante: Max Stahl luta ba umanidade: “In Cold Blood: The Massacre of East Timor”

Iha biban ne’e, Ingrid Bucens agradese ba entidade ne’ebé suporta CASMTL ninia ezisténsia iha Timor-Leste liuhosi mensajen ne’ebé família simu.

“Mensajen hato’o hosi Prezidente Repúblika Timor-Leste, Francisco Guterres ‘Lú Olo’, Eis Prezidente Repúblika Xanana Gusmão, Ramos Horta no ema hotu ne’ebé suporta serbisu iha sentru ne’e sira hatudu kompromisu hodi suporta CAMSTL kontinua eziste iha Timor-Leste. Ida-ne’e bazeia ba Max Stahl nia hakarak, tanba ne’e hanesan família ha’u nafatin suporta tuir kbiit ne’ebé bele, tanba ami laiha buat ruma privadu no ida-ne’e la’ós privadu nian, maibé hanesan Instituisaun Estadu Timor-Leste nian,” Ingrid Bucens tenik.

Jornalista no Realizadór, Cristopher Wenner ho naran koñesidu Max Stahl, hakotu iis iha loron 28 outubru 2021, iha Brisbane-Austrália iha tuku 04:00 dadeersan.

Saudozu hanesan autór ba filmajen Masakre Santa Cruz ne’ebé akontese iha loron 12 novembru 1991, ne’ebé masakre ne’e akontese tanba antes ne’e Militár indonéziu asalta Igreja Motael iha loron 28 outubru 1991, ne’ebé ikus mai tiru mate juventude loriku asswa’in, Sebastião Gomes.

Max Stahl moris iha Reinu Unidu, iha loron 06 dezembru 1954, ne’ebé ninia loron mate iha tinan 30 loron mate Saudozu Sebastião Gomes.

Governu konsidera Saudozu ninia profisionalizmu no korrajen boot tebes hodi fó impulsu fundamentál ba frente diplomátika Rezisténsia timorioan nian, ne’ebé lori Timor-Leste ba pájina dahuluk meiu komunikasaun sosiál mundiál, hafoin tinan barak públika mundiál la hatene situasaun iha Timor-Leste.

Max Stahl estabelese ona CAMSTL ho objetivu atu prezerva no divulga kolesaun audiovizuál ne’ebé dokumenta períodu rezisténsia, durante akontesimentu sira no hafoin referendu no tinan dahuluk independénsia to’o ba loron ohin.

Iha tinan 2013, United Nations Educational, Scientific and Cultural Organization (UNESCO) rekoñese ona kolesaun ne’e no ba rai iha Rejistu Memória ba Mundu, kria ona programa ho objetivu atu proteje no promove patrimóniu dokumentál mundiál liuhosi konservasaun no asesu ba dokumentu sira.

Jornalisra : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here