Prezidente Repúblika, Francisco Guterres 'Lú-Olo'. Imajen Tatoli/Antonio Gonçalves.

DILI, 14 dezembru 2021 (TATOLI)—Prezidente Repúblika, Francisco Guterres Lú Olo, promulga ona dekretu-lei atu implementa medida seguransa alimentár previstu iha lei númeru 8/2021, 3 maiu, ne’ebé  altera lei númeru 14/2020, 29 dezembru, refere ba Orsamentu Jerál Estadu 2021 no aprovasaun medida ba apoiu sósiu-ekonómiku.

Haree ba impaktu negativu husi pandemia COVID-19 iha ekonomia nasionál mak Governu propoin alterasaun ba lei 14/2020 ho medida foun oioin, inklui medida seguransa alimentár.

Lei ne’e fó kbiit ba Centro Lojístiku Nasional (CLN), atu halo kontratu ho produtór lokál no ho operadór komersiál sira seluk, ho hetan ai-han nesesáriu hodi fahe ba ema no família sira ho rendimemtu kiik tebes.

“Dekretu-lei ida-ne’e fó atensaun espesiál ba ita ema no família sira ho rendimentu la-liu $1,90 loron ida. Atu define seé-sé mak iha direitu ba apoiu espesiál ida-ne’e, entidade responsável sira sei uza dadus hosi rejistu uma-kain iha suku ida-idak hosi Ministériu Administrasaun Estatál no hosi Ministériu Solidariedade Sosiál no Inkluzaun,” refere komunikadu imprensa ne’ebé Agência Tatoli asesu liuhosi Palásiu Prezidensiál Nicolau Lobato, Bairru Pite, Dili, tersa ne’e.

Liuhosi sosa ai-han, liu-liu hosi agrikultór sira hodi fahe ba ema no família vulnerável liu, Estadu Timor-Leste insentiva produtór sira atu hasa’e sira-nia produsaun, nune’e kontribui ba família agrikultór sira hodi moris di’akliu.

Tanba, fahe produtu husi agrikultor sira ba família timor-oan sira ne’ebé vulnerável liu, Estadu Timor-Leste hatudu katak tau duni matan ba timor-oan sira-ne’ebé iha tempu susar. 

Ai-han ho valor $30.00 se fó ba sidadaun ka sidadã ne’ebé rejista-an iha “Livru Rejistu Uma Kain” nu’udar Xefe família ka bainhira labele simu, sei  reprezenta hosi membru ida hosi Uma Kain ne’e, ho otas 17  ba leten.

Medida ida-ne’e sei implementa ho osan hosi Fundu COVID-19 ne’ebé tama iha Orsamentu Jerál Estadu no sei implementa to’o 31 dezembru 2021 maibé Ministériu Koordenadór Asuntu Ekonómiku (MAKE) bele hatutan tan.

Diploma ne’e aprova iha Konsellu Ministru iha 27 outubru 2021, tama iha Prezidénsia Repúblika iha 8 novembru 2021 no Prezidente Repúblika promulga iha 10 dezembru 2021.

Ministru Koordenadór ba Asuntu Ekonómiku, Ministru Finansa, Ministru Admnistrasaun Estatál no Ministra Solidariedade Sosiál no Inkluzaun mak sei regulamenta dekretu-lei liuhosi diploma konjuntu ida kona-ba oinsá implementa hodi benefisia ita nia-ema no uma kain sira ho rendimentu la liu $1,90 loron ida.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here