Ministru Administrasaun Estatál, Miguel Pereira de Carvalho. Imajen TATOLI/Francisco Sony.

DILI, 13 dezembru (TATOLI)- Ministru Administrasaun Estatál (MAE), Miguel Pereira de Carvalho, infoma, ba Prezidente Repúblika, Francisco Guterres Lú-Olo kona-ba preparasaun téknika eleisaun Prezidensiál iha 2022.

“Ha’u mai informa ba Prezidente Repúblika  katak Sekretária Téknika Administrasaun Eleitórál (STAE), halo esforsu  hotu  atu garante katak  Eleisaun Prezidensiál iha 2022 ne’e sei halo iha forma ida ne’ebé maka transparante, imparsialidade no neutrualidade,” Ministru Miguel Pereira de Carvalho, hateten  ba jornalista sira hafoin ramata enkontru ho Xefe Estadu iha Palásiu Prezidensiál, Bairru-Pité-Dili, segunda ne’e.

MAE hamutuk ho órgaun eleitorál rua hanesan STAE no CNE, hahú halo preparasaun téknika hanesan resensiamentu eleitorál, akizasaun ba materiál votasaun no hala’o edukasaun sívika atu hasa’e taxa partisipasaun iha prosesu demokratiku ne’e.

Tanba, Xefe Estadu preokupa kona-ba taxa partisipasaun sidadaun nia ba eleisaun prezidensiál iha tinan 2018 hatudu populasaun 80.86% mak partisipa no pur volta eleitór 19% mak la vota.

Ministru Miguel dehan Governu sei aumenta tan sentru votasaun no estasaun votu iha territóriu Timor-Leste atu hasa’e taxa partisipasaun sidadaun nian iha prosesu votasaun.

“Iha tinan 2019, Governu tau de’it sentru votasaun hamutuk 885. Nune’e iha eleisaun prezidensiál 2022 nian ita sei aumenta sentru votasaun to’o 1.200, pur tantu iha aumentu 27% no estasaun votu antes iha 1.500, maibé STAE propoin atu hasa’e ba 1.160,” Governante ne’e afirma.

Kona-ba resensiamentu eleitorál iha diaspora hanesan, Koreia Súl, Irlandia Norte, Portugál inklui Reinu Unidu konsege rejista ona eleitór 7.000, ne’ebé la inklui timór-oan iha Austrália.

“Ami sei tau sentru votasaun no estasaun votu rua iha Portugál hanesan,ida iha Lisboa no  ida fali iha Portu, Austrália ita planu iha Darwin, Koreia Súl sentru votasaun ida, Reinu Unidu estabelese tolu,” nia akresenta.

Resensimentu eleitorál ho baze iha 2017 hamutuk eleitór 784.286, maibé iha ona aumentu eleitór atu tuir votasaun iha tinan oin (2022) hamutuk 850.487.

“Nune’e, ha’u informa ba Prezidente Repúblika katak STAE preparadu loloos atubele realiza eleisaun Prezidensiál tinan oin,” Governante ne’e garante.

Daudaun ne’e, STAE no CNE konklui ona rekrutamentu ba brigadista sira hamutuk 1.200 no iha tempu tuir mai sei rekruta mós ofisiál eleitorál hamutuk 15.000 atubele halo serbisu iha sentru votasaun no estasaun votu iha territóriu nasionál.

“STAE mós serbisu hamutuk ho UNDP atu halo akizasaun materiál votasaun nian iha tempu besik,” nia akresenta.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here