Koodenadór Rejistu Komersiál munisípiu Viqueque, Josenito Pereira de Jesus. Imajen TATOLI/Vitorino Lopes da Costa

VIQUEQUE, 21 dezembru 2021 (TATOLI)–Servisu Rejistu Verifikasaun Emprezariál, Institutu Públiku (SERVE, I.P) munisípiu Viqueque, hahú janeiru to’o dezembru 2021, konsege rekolla taxa hamutuk $2.568,50.

“Taxa ne’ebé rekolla hosi rejistu empreza sira iha sukursál Viqueque, tanba empreza balun ba rejista iha Baucau no Dili, maibé ba oin empreza sira iha Viqueque sei la ba halo rejista tan iha li’ur,” Koodenadór Rejistu Komersiál munisípiu Viqueque, Josenito Pereira de Jesus, hateten ba Agência TATOLI, iha ninia knaar fatin, Viqueque villa, tersa ne’e.

Notísia relevante: Agostu, SERVE,I.P Viqueque rekolla $492

Tuir dadus, taxa hosi janeiru hamutuk $160, fevereiru hamutuk $260, marsu $90, abríl $117, maiu $43, juñu $85,50, jullu $283, agostu $492, setembru $396, novembru $317 no dezembru $137.

Tipu negósiu ENIN rejista foun hamutuk 116, Unipesoal LDA 34, Lda ida, nune’e totál 151, ba renovasaun tipu ENIN 116, Unipesol LDA 80, LDA ida, nune’e totál renovasaun 151 no ba alterasaun hosi tipu ENIN hamutuk 22, Unipesoal LDA 43, LDA laiha, nune’e totál alterasaun 65.

“Durante tinan-ida ami konsege regista empreza hamutuk 455 iha SERVE Viqueque. Dezafiu ne’ebé durante ne’e ami enfrenta mak fatin ne’ebé la sufisiente ba ami hodi ami halo servisu, nune’e ami tenta ona husu administrasaun munisípiu maibé seidauk indika fatin ruma ba ami,” nia akresenta.

Maski nune’e, servisu atendimentu rejistu emprezariál iha munisípiu ne’e la’o nafatin.

“Espera iha futuru ami bele hetan fatin sufisiente hodi bele hala’o servisu di’ak liután,” nia dehan.

Entretantu, daudaun funsionáriu SERVE, I.P sukursál Viqueque hamutuk na’in-lima inklui koordenadór ida.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here