DILI, 21 dezembru 2021 (TATOLI)—Parlamentu Nasionál, tersa ne’e, aprova rezolusaun votu kongratulasaun ba ‘Tais’ Timor-Leste (TL) ne’ebé UNESCO fó rekuñesimentu mundiál sai patrimóniu kulturál no materiál.

Notísia Relevante: PM lansa rekuñesimentu “tais” sai patrimóniu kulturál mundiál

Parlamentu Nasionál aprova votu kongratulasaun númeru 33/2021 ne’e ho rezultadu votasaun a-favór 39, kontra 0 no abstensaun 0.

“Nune’e votu kongratulasaun pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária, tersa ne’e.

Deputadu proponente ba votu kongratulasaun ne’e mak Maria Angelina Sarmento, Isabel Ferreira, Olinda Guterres, Aderito Hugo da Costa ho Elena Martins Belo.

Vise Prezidente PN, Maria Angelina Sarmento, hateten nu’udar proponente ho votu kongratulasaun ne’e hakarak parabeniza povu Timor-Leste liu-liu inan soru-na’in sira-ne’ebé durante ne’e kontinua hela bei’ala sira-nia kultura soru tais ho materiál lokál ne’ebé tradisionál no orijinál.

Nia kongratula mós ekipa Sekretária Estadu Arte no Kultura (SEAK) ho entidade sira seluk ne’ebé lidera prosesu refere.

”Tanba ita halo ita-nia demostrasaun ba prosesu soru-tais ida-ne’e hahú kedas hosi materiál prima to’o sai ba tais iha UNESCO no fatin barak, nune’e komité UNESCO haree katak prosesu ne’ebé naruk uza materiál la fasíl atu hetan iha ita-nia ra’in. Materiál sira-ne’e hahú menus ba beibeik tanba ita ladún fó importánsia atu kuda ai sira-ne’ebé bele prodús sai kabas no korantes, ho ida ne’e UNESCO konsidera materiál ne’ebé sei bele lakon bainhira ita la halo salva-guarda ho urjente,” nia hateten.

Nune’e iha 14 dezembru liubá UNESCO konsidera no rekuñese “tais” Timor-Leste hanesan patrimóniu kulturál mundiál no immaterial.

Deputada hosi PLP ne’e dehan, votu kongratulasaun atu insentiva no estimula liután soru-na’in sira liu-liu ba inan-feton nomós ba ministériu relevante sira atu kontinua fó formasaun ba jerasaun foun sira iha kontinuidade kultura soru tais labele kotu, maibé hatene prezerva no hodi loke dalan kompete iha merkadu internasionál.

Xefe Bankada KHUNTO, Deputada Olinda Guterres, agradese ba UNESCO tanba fó sai ona anusiu hodi rekuñese tais Timor-Leste sai patrimóniu mundiál hodi valoriza ba iha mundu tomak.

Nune’e mós, Deputada Elena Martins, hateten ministéiru relevante presiza prezerva tais liuhosi oinsá mak soru-na’in sira iha motivasaun atu prodús tais orjinál ho kuantidade barak, liu-liu hodi tau importánsia ba instrumentu ne’ebé uza hanesan kuda kabas no sira seluk tán.

Deputada CNRT, Maria Barreto, husu Governu atu apoia aumenta plantasaun ba matéria prima halo Tais nian tanba instrumentu hirak ne’e ohin loron menus daudaun.

Prezidente Parlamentu Nasionál (PPN), Deputadu Aniceto Longuinhos Guterres Lopes, pronunsia meza PN sei tur hamutuk ho komisaun G hodi hola inisiativa rezolusaun ketak ho ninia substansia ida kona-ba polítika promove no valoriza tais ne’ebé konten ho sujestaun deputadu sira-nian, nune’e Governu bele tau atensaun.

Notísia Relevante: PN kongratula “Tais” sai patrimóniu mundiál, Governu tenke deside loron nasionál ba “Tais”

Jornalista : Nelson de Sousa

Editór       : Cancio Ximenes

PUBLISIDADEiklan