Traballadór timor-oan sira submete ba pasa revista dokumentu iha Aeroportu Internasionál Prezidente Nicolau Lobato, Comoro, molok arranka ba Koreia Súl, segunda (13/12). Imajen/SEFOPE

DILI, 13 dezembru 2021 (TATOLI)–Governu Timor-Leste liuhosi Sekretaria Estadu Formasaun Profisionál no Empregu (SEFOPE), iha segunda ne’e, haruka tan traballadór timor-oan na’in-23 ba serbisu iha Koreia Súl.

“Ita-nia traballadór ne’ebé ohin arranka, hanesan sira ne’ebé antes serbisu ona iha ne’ebá, tanba ne’e ita halo teste profisionál no ohin na’in-23 ba serbisu tan iha Koreia Súl,” Diretór Nasionál Empregu Exteriór SEFOPE, Filomeno Soares, hateten, bainhira akompaña traballadór sira iha Aeroportu  Internasionál Prezidente Nicolau Lobato, Comoro.

Notísia relevante: Joven na’in-2.023 pasa kursu lian koreia

Traballadór sira ne’ebé ohin halo viajen, sei serbisu iha área fábrika na’in-sia no área peska na’in-14, ne’ebé hetan ona kontratu balun ba tinan-tolu no balun ba tinan-haat fulan-ualu.

“Bainhira kontratu hotu tenke  husu traballadór sira filafali mai, nune’e karik iha teste espesiál ruma akontese tan sira bele hetan oportunidade tuir teste. Ha’u husu ba traballadór sira mantein nafatin regra sira ne’ebé iha hanesan labele lakon kontrolu hosi parte adidu traballu iha Koreia,” nia akresenta.

Iha fatin hanesan, Traballadór, Cirilio Celetino Freitas, agradese ba Governu tanba maski iha situasaun COVID -19 nia-laran, maibé bele fó oportunidade ba sira bele serbisu iha rai-li’ur.

“Sente kontente tebes ba oportunidade ida-ne’e, tanba bele hadi’a moris família nian,” nia hateten.

Tinan ida ne’e, SEFOPE haruka traballadór timor-oan hamutuk 240 ba serbisu iha Koreia Súl.

Hahú hosi tinan 2009 to’o 2020 traballadór hamutuk 3.681 mak serbisu iha Koreia Súl, na’in-905 maka fila ona mai Timor-Leste, kompstu hosi mane 852 no feto 53.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here