Diskusaun no votasaun Proposta Lei OJE 2022 iha faze espesialidade, iha sala plenária Parlamentu Nasionál, kuarta (15/12) Imajen TATOLI/António Gonçalves

DILI, 16 dezembru 2021 (TATOLI)–Primeiru-Ministru (PM), Taur Matan Ruak, hato’o agradesimentu ba membru Parlamentu Nasionál (PN) tanba aprova ona Proposta Lei Orsamentu Jerál Estadu (OJE) ba tinan fiskál 2022 ho valór biliaun $2.

“Lori VIII Governu Konstitusionál nia naran no iha ha’u-nia naran rasik, agradese ba deputadu sira ne’ebé partisipa másimu iha debate ne’e saudável ne’ebé ita dezenvolve iha loron hirak ne’e, kontribui tebes ba esklaresimentu timor-oan hotu atu hatene di’ak liután opsaun boot hosi planu no orsamentu ba tinan oin mai, ho objetivu reforsa reziliénsia país no promove koezaun ekonómiku no sosiál,” Xefe Governu, deklara iha aprovasaun Proposta Lei OJE 2022 iha finál global iha PN, kinta ne’e.

Nune’e, Governu haksolok tanba kumpre ona dever ba sidadaun iha debate orsamentu to’o faze finál.

Notísia relevante: PN aprova proposta OJE 2022 billaun $2 iha finál globál

Ba kestaun ne’e, ezekutivu sira rejista konsiderasaun no intervensaun oioin, ho opiniaun polítiku no partidária  diferente, maski hosi diverjensia hirak ne’e, membru Parlamentu ho fuan nakloke mantein espíritu konstrutivu ne’ebé sentradu iha interese umana.

“Ha’u fiar ita hotu hetan parabéns ba eskolla ne’ebé ita halo no desizaun ne’ebé ita foti iha momentu difísil, hodi mellora versaun originál sai konsensuál liután no sensível ba lejítima espetativa moris di’ak no dezenvolvimentu país no povu, ne’ebé sei halo diferensa,” Taur subliña.

Xefe Governu konsidera, medida hotu iha debate PN no opiniaun públika bele akompaña diretamente ho interese atu promove sidadania ativa no partisipativa liután, liuhosi órgaun komunikasaun sosiál iha organizasaun oioin ne’ebé hola parte ba sosiedade forte no nakonu ho enerjia, hanesan parte ida hosi demokrasia.

“Orsamentu ne’e iha atuál konjuntura natalísia no festiva finál tinan ne’e, konstitui prezente ida folin-boot ba inkluzaun sosiál no sensibilidade umana, ein favór ba grupu no ema sira ne’ebé laiha liu, ema kbiit-laek no ema dezfavoresidu sira hanesan ferik no katuas, labarik, inan no feto sira ein jerál, inklui sidadaun sira ho inkapasidade fízika no mental,” PM dehan.

Biban ne’e, Xefe Governu kumprimenta sidadaun hotu iha rai-laran no rai-li’ur, hodi transmite mensajem kariñu no mellora votu saúde, paz no armonia familiár.

PN hahú debate proposta orsamentu iha loron 01 dezembru to’o ohin loron, ne’ebé antes ne’e Proposta Lei OJE 2022 ne’ebé Governu hato’o ho montante biliaun $1,675, maibé hafoin diskusaun durante semana rua, mosu proposta barak hosi deputadu sira, nune’e iha aumentu millaun $325, sai biliaun $2.

Iha planu anuál tinan 2022, Governu reflete kontinuasaun serbisu reforsa jestaun finansa públika, ne’ebé susesivu liuhosi roteiru orsamentasaun kada programa, ne’ebé integra programa hamutuk 45, sub-programa 477 no totál atividade 2.445.

Kuadru Planeamentu kona-ba orsamentasaun kada programa bazea ba Planu Estratéjiku Dezenvolvimentu (PED) 2011-2030 no Objetivu Dezenvolviemntu Sustentável (ODS) 2030, hanesan dokumentu estratéjiku no dokumentu polítiku.

Jornalista : Antónia Gusmão.

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here