Produtu Cesta Bázika iha bote-laran Imajen TATOLI/Antónia Gusmão

AINARO, 09 jullu 2021 (TATOLI)—Membru família 766 hosi uma-kain 167 iha aldeia Mausuku Arte-moris no hudi, suku Cassa, postu administrativu Ainaro villa, munisípiu Ainaro, rejeita simu produtu Cesta Bázika hosi kompañia fornesedór tanba deskontente ho kuantidade sasán ne’ebé la to’o valór osan ba kada ema ne’ebé mensiona iha dekretu-lei.

“Momentu kompañia distribui iha suku Cassa, uma-kain balun la konsege foti sira-nia direitu, nune’e totál ami tau membru família 766 mak seidauk simu, maibé ami labele dehan sira reklamante, tanba la’ós kompañia mak lakohi distribui sasán, maibé membru família mak rejeita simu ho razaun kustu sasán la to’o $50,” Pontu fokál programa distribuisaun Cesta Bázika iha munisípiu Ainaro, Manuel Ramos Pinto, hateten durante intervensaun iha seremónia enserramentu Cesta Bázika iha salaun administrasaun, sesta ne’e.

Ainaro iha aldeia 131, suku 21 no postu administrativu haat, ne’ebé iha aldeia rua iha suku Cassa mak problema iha distribuisaun.

“Ami hato’o ona relatóriu ba Sekretaria Estadu Kooperativa no Ministériu Administrasaun Estatál (MAE), ne’ebé inklui ho problema sira,” nia akresenta.

Notísia relevante: SEKoop enserra distribuisaun Cesta Bázika iha Ainaro

Ho problema ne’e, ekipa pontu fokál distibuisaun husu ona autoridade munisipál hodi hato’o relatóriu ba SEKoop no MAE hodi buka solusaun.

“Ami-nia esforsu durante problema ne’e mosu maka ami ba halo aprosimasaun no relatóriu ami hato’o ona ba SEKoop no MAE, tanba ne’e hein bele iha desizaun,” nia hatutan.

Hatán ba preokupasaun ne’e, Sekretáriu Estadu Elizário Ferreira, konsidera kada sidadaun iha direitu atu hato’o nia pozisaun entre simu no la simu, maibé desizaun tomak iha Ministériu Koordenadór Asuntu Ekonómiku (MKAE) no ministériu implementadór programa.

“Relatóriu ne’ebé dehan aldeia balun iha Ainaro rejeita simu, sira iha direitu, hosi parte ministériu implementadór rekomenda ba Ministru Koordenadór Asuntu Ekonómiku hodi bele deside, atu nafatin ka aumenta, ou atu fó ba ema kbiit laek sira ne’ebé sofre durante inundasaun iha Dili,” nia subliña.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika fixa membru agregadu familiár sei hetan $25, kada fulan iha fulan-rua ($50) nia laran, ne’ebé troka ho folin sasán ne’ebé korresponde ba valór osan.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here