Embaixadór Austrália iha Timor-Leste, Peter Roberts. Imajen TATOLI/Francisco Sony

DILI, 20 dezembru 2021 (TATOLI)–Embaixadór Austrália iha Timor-Leste, Peter Roberts, segunda ne’e, hato’o despedida ba Prezidente Repúblika (PR), Francisco Guterres ‘Lú Olo’ tanba termina ona misaun diplomátiku kuaze tinan-haat, ne’ebé antes ne’e hato’o kredensiál ba Xefe Estadu iha loron 23 fevereiru 2018.

“Ohin ha’u hasoru Prezidente Repúblika atu halo despedida tanba ha’u-nia mandatu iha Timor-Leste durante tinan haat ne’e ramata ona no ha’u sei filafali bá Austrália iha fulan ida-ne’e,” Embaixadór Peter Roberts, hateten, hafoin hasoru malu ho Prezidente Repúblika iha Palásiu Prezidensiál, Aitarak-Laran.

Notísia relevante: PR Simu Tan Kredensiál Hosi Nasaun Haat

Biban ne’e, nia hato’o sentimentu kontente tanba durante ninia mandatu, konsege halo kooperasaun di’ak entre país rua iha situasaun saida de’it, liuliu situasaun pandemia no dezastre naturál, tanba ne’e nia iha esperansa kooperasaun bele kontinua no la’o di’ak liután.

Embaixadór ne’e nota mós katak iha tinan-tolu liubá país rua konkorda ona kooperasaun iha área seguransa marítima, tanba ne’e presiza hametin kooperasaun iha área oin-oin no lori investidór hosi Austrália mai Timor-Leste.

“Daudaun ne’e Austrália iha programa boot iha área dezenvolvimentu iha setór agrikultura, suporta programa nasionál dezenvolvimentu suku, no setór privadu. Kooperasaun ne’e sei kontinua nafatin, kada tinan Austrália apoiu milliaun $100 ba programa iha Timor-Leste,” nia tenik.

Notísia relevante: Timor-Leste no Austrália sei selebra akordu instalasaun Portu Hera

Nune’e, durante sorumutuk, Xefe Estadu kontente no apresia ba kooperasaun entre país rua ne’e, partikularmente iha tempu COVID-19 no bele serbisu hamutuk iha área vasinasaun no tempu kalamidade.

Jornalista : Arminda Fonseca

Editora      : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here