Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (28/07). Imajen TATOLI/Egas Cristóvão

DILI, 28 jullu 2021 (TATOLI)—Governu liuhosi reuniaun Konsellu Ministrun (KM) fó podér tomak ba Ministru Defeza (MD), Filomeno da Paixão de Jesus, hodi asina akordu ho Departamentu Defeza Austrália nian (DDA) ba atividade infraestrutura no instalasaun sira iha Portu Hera.

Tanba ne’e, tempu badak Timor-Leste no Austrália sei selebra akordu ba inisiativa ne’e.

“Akordu ne’e atu promove dezenvolvimentu infraestrutura hodi hasa’e kapasidade no sustentabilidade FALINTIL-Forsa Defeza Timor-Leste (F-FDTL),” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Ho akordu ne’e, DDA sei realiza atividade ne’ebé nesesáriu ba konstrusaun iha Portu Hera hodi entrega iha tinan 2023 inklui ró patrulla rua ne’ebé Austrália sei fó ba Timor-Leste.

Tuir kálkulu, konstrusaun Portu Navál Hera presiza orsamentu millaun $20-resin, maibé Governu nasaun rua sei aloka orsamentu pur faze to’o konstrusaun ramata.

VIII Governu Konstitusionál iha polítika no planu ba konstrusaun portu no sosa ró atubele halo operasaun iha tasi mane, ne’ebé  foku ba patrullamentu no lojíztika bainhira halo produsaun mina iha tasi Timór, liuliu tau-matan ba polusaun, inséndiu no ema ilegál ne’ebé tama no sai tasi laran.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here