Jornalista Agência TATOLI halo entrevista ho Responsável Kaixa Inglatera, Saturnino da Costa Belo ‘Brani’. Imajen TATOLI/Anito Soares

DILI, 17 dezembru (TATOLI)—Kaixa Inglatera mosu tanba prezensa Jornalista britániku, Christopher Wenner ho naran koñesidu ‘Max Stahl’, iha Baucau hodi hasoru malu ho Komandante David Alex ‘Daitula’ iha tinan 1991.

“Kaixa Inglatera mosu hahú hosi tinan 1990 ho naran Macau no ikus mai iha tinan 1991 bainhira Jornalista Max Stahl nia prezensa iha Baucau halo entrevista ho Komadante Daitula, mak Komadante rasik muda naran Macau sai fali Kaixa Inglatera,” Responsável Kaixa Inglatera, Saturnino da Costa Belo ‘Brani’, hateten ba Agência TATOLI, iha edifísiu Centro Audiovizual Max Stahl Timor-Lete (CAMSTL), Benfica, sesta ne’e.

Notísia relevante: Saturnino: “ha’u lori Max Stahl hasoru Komandante Daitula”

Durante funu nia-laran, Kaixa Inglatera halo funsaun hanesan postu ida-ne’ebé halo ligasaun entre polítiku Frente Armada no Frente Kalandestina.

“Kaixa Iglatera nia objetivu mak hanesan rai segredu entre frente rua bainhira situasaun manas, la hasoru malu halo karta ba malu liuhosi Kaixa Inglatera, fulan ida dala-rua, ita hatama karta ba kaixa, kee rai kuak no hatama hodi maluk hosi ai-laran mai foti haree no troka fali hosi villa ba foti,” Saturnino da Costa, esplika.

Ema ne’ebé harii Kaixa Inglatera mak hanesan Wairia, Virgílio oan Kiak, Francelino Maubulak, Alcino ‘Samodok’ no Saturnino da Costa.

“Durante harii Kaixa Inglatera hodi halo ligasaun ba villa, ai-laran no rai-li’ur, inimigu konsege kaptura ha’u dala-rua no kastigu durante tinan-haat no iha tinan 1991 kaer filafali ha’u no lori ba kastigu iha Indonézia to’o tinan 1998 mak filafali mai Timór,” nia nia konta tuir.

Tanba ne’e, ho istória sira ne’ebé iha, iha ona inisiativa harii monumentu Max Stahl iha Samalari hanesan rekordasaun ida.

“Maibé agora sei planu bainhira hakoi tiha Max Stahl nia sinza mak ami sei ko’alia kona-ba asuntu ida-ne’e,” nia dehan.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here