Responsável Kaixa Inglatera, Saturnino da Costa Belo ‘Brani. Imajen TATOLI/Anito Soares

DILI, 17 dezembru 2021 (TATOLI)–Responsável Kaixa Inglatera, Saturnino da Costa Belo ‘brani’, hateten, nia parte mak fasilita Jornalista britániku, Christopher Wenner ho naran koñesidu ‘Max Stahl’ hasoru malu ho Komandante David Alex ‘Daitula’, iha Baucau.

“Ha’u koñese Saudozu Max Stahl hosi ha’u-nia kolega ida naran Francisco Carvalho ‘Maucalo’, ne’ebé hetan nia subar iha Padre João de Deus ninia rezidénsia iha Laga, ho objetivu atu hasoru Komandante Daitula, nune’e ami halo planu no ha’u mak lori nia ba hasoru malu ho Komandante Daitula,” Responsável Kaixa Inglatera, haktuir ba Agência TATOLI, iha edifísiu Centro Audiovizual Max Stahl Timor-Lete (CAMSTL), Benfica, sesta ne’e.

Nia konta tuir, Komandante Daitula antes ne’e rejeita hasoru malu Max Stahl, tanba tauk inimigu bele hatene subar fatin no destroi.

“Iha loron 07 novembru 1991 tuku 18:00 lorokraik, ha’u lori sai Max Stahl hosi villa bá Komandante Daitula nia subar fatin iha Samalari, Bana Lugalolo, tuku 20:00 kalan, no haruka nia hein hodi ha’u rasik bá hasoru Komandante Daitula no ikus mai Komandante simu prezensa Max Stahl. Durante viajen hosi villa bá ai-laran, bainhira halo konversa iha dalan, Jornalista ne’e sempre husu distánsia Komandante sira-nia hela fatin besik ona ka seidauk. Ha’u hatan sei dook, ne’ebé iha dalan nia sempre hakfodak ho ahi-lakan sira ne’ebé komunidade sunu halo to’os, tanba nia hanoin dehan inimigu sira,” nia akresenta.

Notísia relevante: Saudozu Daitula nia istória folin boot iha prosesu luta ba ukun rasik-an

Nune’e, iha loron 07 novembru kalan, bainhira to’o iha fatin destinasaun, Komandante Daitula ho ninia membru simu tiha Max Stahl, no halo kedas entrevista kona-ba situasaun rai-laran nian.

“Momentu ne’ebá iha entrevista, liafuan ne’ebé Komandante Daitula husu Jornalista, atu disponibiliza sira-nia aspirasaun liuhosi fó sai informasaun ne’e ba Organizasaun Nasaun Unida (ONU). Max Stahl hatán bele, tanba ha’u mai iha ne’e atu lori imi-nia aspirasaun sira bá mundu,” nia hateten.

Iha loron 08 novembru dadeersan, Jornalista ne’e fila sedu  bá Dili no momentu ne’ebá kedan Komandante Daitula ninia membru sira hamos kedan ain-fatin.

“Momentu ne’ebá Max Stahl uza sapatu Europa nian, entaun sapatu hosi Ázia no Europa nia la hanesan, tanba ne’e mak tenke hamoos ain-fatin hodi inimigu sira labele hatene prezensa Jornalista,” nia tenik.

Hasoru malu entre parte rua durante loron-rua, hahú hosi 07 novembru kalan to’o sai fali hosi abrigu Komandante Daitula nian iha loron 09 novembru kalan.

Hosi ne’e, Komandante Daitula orienta ninia elementu ‘Amiko’ no ‘Markom’ atu akompaña Max Stahl, no hosi parte Frente Klandestina mak Saudozu ‘Samodok’ no ‘Maubulak’ mak akompaña  sai hosi abrigu.

“Mai hasoru ha’u ho Komandante Domingos ‘Tarkoka’, ne’ebé hein iha área Watalata, Samalari, to’o mai Max Stahl entrega kedas kasete ho rollu gravadu entrevista, no Jornalista rasik la’o ho mákina primária ne’ebé mamuk. Bainhira atu filafali mai villa, inimigu okupa ona fatin ne’ebé antes ne’e sira liu, entaun durante fila sira buka dalan seluk to’o villa no la’o fahe malu, Max Stahl ho saudozu Samodok no Maubulak,” Saturnino da Costa dehan.

Bainhira tama villa, buskada Max Stahl iha jardín eroi militár ninian iha Calilara.

“Ema kaer tiha Jornalista no halo pasa revista ba nia, ne’ebé hetan duni mákina filmajen no fotográfiku sira maibé mamuk, entaun husik tiha nia. Sasán ne’ebé ha’u rekolla ne’e iha loron 10 dezembru dadeersan mak ha’u entrega ba kolega ‘Maucalo’ mak lori ba entrega iha Padre João de Deus ninia rezidénsia no nia simu fali,” nia haktuir.

Prosesu lori Max Stahl ba hasoru malu ho Komandante Daitula, Saturnino la tauk mate, tanba ho hanoin ida de’it, tempu to’o ona atu Jornalista fó sai ka levanta situasaun ne’ebé Timor-Leste hasoru.

“Tanba ne’e, ba ha’u pesoalmente haree Max Stahl hanesan ema ne’ebé fuan boot hodi kontribui ba ita-nia luta,” nia akresenta.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here