Kondisaun estrada ligasaun postu administrativu Lolotoe, mai kapitál Maliana. Imajen TATOLI/Sérgio da Cruz.

BOBONARO,15 dezembru 2021 (TATOLI) – Prezidente Repúblika, Francisco Guterres ‘Lú Olo’ sai sasin ba promesa hosi Ministériu Obra Públika (MOP) halo reabilitasaun ba kondisaun estrada ligasaun entre kapitál Maliana ba postu administrativu Bobonaro no Lolotoe iha tinan 2022.

Vise-Ministru Obra Públika, Nicolau Lino Freitas Belo, aprezenta planu ne’e hodi hatán ba preokupasaun autoridade lokál no Komunidade sira durante diálogu ho Prezidente Repúblika Francisco Guterres ‘Lu Olo’, iha Jináziu Maliana, kinta ne’e.

“Planu ba tinan 2022 sei halo projetu reablitasaun estrada hosi munisípiu Bobonaro ba iha postu administrativu Lolotoe ho distánsia kilómetru 8,9. Ida-ne’e mak ita sei halo,” Vise-Ministri Obra Públika, Nicolau Lino Freitas Belo promete ba komunidade no sasin hosi Prezidente Repúblika.

Nia fó-sai katak, prioridade reabilitasaun estrada rurál iha iha munisípiu Bobonaro hamutuk distánsia kilómetru 50,7, sei abranje hotu ba postu administrativu Maliana Vila, Balibo, Atabae, Cailaco, Bobonaro no Loloto’e ne’ebe presiza asesu ba estrada nasionál.

Nune’e mós estrada Urbana sei konstrui iha Maliana Vila ho distánsia kilómetru 23 no konstrusaun estrada no ponte liga hosi suku Batugade mai postu administrativu Balibo mós tama iha planu tinan oin.

“Projetu sira-ne’e 80% tama ona planu, fulan-rua liubá Konsellu Administrasaun Fundu Infraestrutura (CAFI, sigla portugés) ne’ebé lidera hosi Vise-Primeiru Ministru aprova  ona ita sei tama faze konstrusaun maibé ita sei hein prezidente promulga atu ita hahú implementa ona,” governante ne’e fó esperansa ba komunidade sira.

Xefe suku Lebos, postu administrativu Lolotoe, Jacinto Pereira, hateten, durante tinan barak ona kondisaun estrada parte Lolotoe sai difikuldade boot ba komunidade sira-nia movimentasaun hodi asesu ba merkadu.

Nia haktuir, durante ne’e empreza nasional no lokál sira sempre ba halo levantamentu no estudu viablidade, maibé realidade estrada refere nafatin ho kondisaun grave.

“Ami Lolotoe mós baliza ho Indonézia ho nune’e ami sente moe haree ema nasaun Viziñu nia estrada di’ak, ami-nia mak ladi’ak nafatin iha suku hitu ne’e hotu kedas,” nia dehan.

Notisia relevante: Autoridade munisipál koordena MOP prioritiza estrada Maliana-Bobonaro no Lolotoe

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here